Son altı ayda 50 min nəfərin Almaniyaya daxil olmasına icazə verilməyib
Berlin, 1 aprel, AZƏRTAC
Almaniyanın quru sərhədlərində tətbiq edilən yoxlamalar nəticəsində 2024-cü il sentyabrın 16-dan indiyədək 86 min qanunsuz sərhəddənkeçmə halı qeydə alınıb, 2 minədək qaçaqmalçı həbs edilib, təxminən 50 min nəfər geri qaytarılıb.
AZƏRTAC “Bild” qəzetinə istinadla xəbər verir ki, bu barədə Almaniyanın daxili işlər naziri Nensi Fezerin hökumətin başa çatan qanunvericilik dövrü üzrə miqrasiya siyasətinə dair hesabatında qeyd olunub.
Hesabata əsasən, 2021-ci ildən sonra ölkəyə ixtisaslı kadrların miqrasiyası 77 faiz artıb, sığınacaq verilməsi ilə bağlı müraciətlərin sayı isə iki il əvvəllə müqayisədə 50 faiz azalıb. Həmçinin son iki ildə geri göndərmələr 55 artıb. Daxili sərhəd nəzarəti tədbirləri nəticəsində 50 min nəfər Almaniyadan geri qaytarılıb.
Rusiya-Ukrayna müharibəsinin başlanmasından sonra ölkəyə gələn ukraynalıların sayı 2025-ci il fevral ayının sonuna olan məlumata əsasən 1,25 milyondan çox olub. Bu ilin yanvar-mart aylarında 32 min 671 sığınacaq müraciəti qeydə alınıb. Bu rəqəm 2024-cü ildə 213 min, 2023-cü ildə isə 324 min 636 olub.
Xatırladaq ki, Almaniyanın daxili işlər naziri Nensi Fezerin qərarı ilə ötən il sentyabrın 16-dan etibarən Fransa, Lüksemburq, Belçika, Danimarka və Niderland ilə sərhədlərdə yoxlamaların aparılmasına başlanılıb. Polşa, Çexiya və İsveçrə ilə sərhədlərdə 2023-cü ilin oktyabrından, Avstriya ilə sərhəddə isə 2015-ci ildən yoxlamalar aparılır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
