SOYUQLAR VƏ GÜCLÜ QAR YAĞINI TÜRKİYƏNİ TƏRK ETMİR
Xəbər verdiyimiz kimi, bu qış Türkiyə ərazisində olduqca soyuq və qarlı keçir. Soyuq hava siklonları bir-birinin ardınca ölkənin bütün ərazisini bürüyür. Yanvarın 10-dan etibarən Aralıq dənizindən gələn yeni soyuq hava siklonu bərabərində qar və tufan gətirmişdir. Əlverişsiz hava şəraiti nəticəsində Mərmərə dənizində dəniz nəqliyyatının fəaliyyəti tamamilə dayandırılmışdır. Buradakı tufan gəmilərin boğazlardan keçməsinə də ciddi maneə törədir. Əlverişsiz hava şəraiti avtomobil nəqliyyatının fəaliyyətinə də mənfi təsir göstərir. Belə ki, Konya-Antalya avtomobil magistralı qaz səbəbi ilə bağlanmışdır. Burada qar örtüyünün qalınlığı 15 sm-yə çatmışdır. Yolların buz bağlaması isə çox sayda avtomobil qəzasına gətirib çıxarmışdır. Mərmərə dənizində küləyin gücü saatda 70-80 kilometrdir. Antalyada aramsız yağan yağışlar nəticəsində Ağva çayı daşmış, kənd təsərrüfatına böyük zərər dəymişdir.
Meteoroloqların təxmininə görə soyuq hava bu həftənin ortasına qədər təsirli olacaqdır.
