DÜNYA
Srebrenitsa soyqırımı qurbanlarının xatirəsi yad olunub
Sarayevo, 11 iyul, AZƏRTAC
İyulun 11-də Bosniya və Herseqovinada Srebrenitsa soyqırımının 28-ci ildönümü ilə əlaqədar anım tədbirləri keçirilib.
AZƏRTAC xəbər verir ki, soyqırımı qurbanlarının xatirəsinə həsr olunan “Sülh yürüşü”nün təxminən 3000-dən çox iştirakçısı üç gün ərzində 100 kilometr məsafə qət edib, yürüş Potoçari Memorial Qəbiristanlığında başa çatıb.
Paytaxt Sarayevoda yerli vaxtla saat 12:00-da soyqırımı qurbanlarının xatirəsi bir dəqiqəlik sükutla yad olunub. Ölkənin cənubundakı Mostar şəhərindəki tarixi körpüdə soyqırımı qurbanlarının xatirəsinə ehtiram əlaməti olaraq suyatullanma təşkil edilib.
İyulun 11-də Srebrenitsa soyqırımının daha 30 qurbanı dəfn olunub.
Qeyd edək ki, 1995-ci ilin iyulunda Srebrenitsa şəhərində törədilən soyqırımı zamanı 8372 günahsız bosniyalı müsəlman qətlə yetirilib. Günahsız mülki insanlar, xüsusilə də qadın və uşaqlar serb millətçiləri tərəfindən vəhşicəsinə öldürülüb. Qətliamın qurbanı olan bosniyalılar kütləvi məzarlıqlarda basdırılıb.
Potoçari Memorial Qəbiristanlığında indiyədək 6751 nəfər dəfn olunub. Faciədən 28 ilə yaxın vaxt keçməsinə baxmayaraq, soyqırımı qurbanlarının 1000-dən çoxunun cəsədi hələ də tapılmayıb.
Sarayevo