Srebrenitsa soyqırımının ildönümü ilə əlaqədar “Sülh yürüşü” başlayıb
Sarayevo, 8 iyul, AZƏRTAC
Srebrenitsa soyqırımının 28-ci ildönümü çərçivəsində soyqırımı qurbanlarının xatirəsinə həsr olunan “Sülh yürüşü” başlayıb.
AZƏRTAC xəbər verir ki, Bosniya və Herseqovinanın Srebrenitsa şəhərində 1995-ci il iyulun 11-də başlayan soyqırımından xilas olmaq istəyən bosniyalı vətəndaşların Tuzla şəhərinə getmək üçün istifadə etdiyi meşə yolunda “Sülh yürüşü” keçirilib. Bu il 19-cu dəfə təşkil olunan yürüşdə 3000-dən çox insan iştirak edib. İştirakçılar üç gün ərzində təxminən 100 kilometr məsafə qət edəcəklər və yürüş iyulun 10-da Potoçari Memorial Qəbiristanlığında başa çatacaq.
Qeyd edək ki, bu meşə yolu xalq arasında “ölüm yolu” adlandırılır. İyulun 11-də keçiriləcək anım mərasimində soyqırımının daha 30 qurbanı dəfn olunacaq.
İkinci Dünya müharibəsindən sonra Avropada ən böyük insanlıq faciəsi olaraq xarakterizə edilən Srebrenitsa soyqırımı 8372 günahsız bosniyalı müsəlmanın qətlə yetirilməsi ilə nəticələnib. Öldürülən bosniyalılar kütləvi məzarlıqlarda basdırılıb. Potoçari Memorial Qəbiristanlığında indiyədək 6721 nəfər dəfn edilib. Faciədən 28 ilə yaxın vaxt keçməsinə baxmayaraq, soyqırımı qurbanlarının 1000-dən çoxunun cəsədi hələ də tapılmayıb.
Nihad Budaqov
AZƏRTAC-ın xüsusi müxbiri
Sarayevo
Bölmənin digər xəbərləri
