Stokholmda qocalara qarşı fırıldaqçılıq faktlarının sayı artır
Stokholm, 12 avqust, Nərgiz Cəfərli, AZƏRTAC
Stokholmda fırıldaqçıların müxtəlif bəhanələrlə qocaların evlərinə daxil olaraq qiymətli əşyaları oğurlaması halları getdikcə daha çox qeydə alınır.
AZƏRTAC xəbər verir ki, polisin məlumatına görə, belə cinayətlərdən əldə edilən gəlir narkotik vasitələrin qanunsuz dövriyyəsindən əldə edilən gəlirdən iki dəfə çoxdur və milyardlarla krona çatır.
2024-cü ildə fırıldaqçılıq cinayətlərindən ümumi dövriyyə 6,3 milyard kron (600 milyon dollardan çox) təşkil edib.
Çox vaxt cinayətkarlar özlərini polis və ya təşkilat əməkdaşı kimi təqdim edərək qurbana zəng edir və ya məktub yazır və onları əmlakı “qorumağa” inandırırlar. Onlar etibar qazanmaq üçün əzbərlənmiş ssenarilərdən və psixoloji təzyiqdən istifadə edir, sonra isə düşünməyə vaxt verməyərək insanı tələsdirirlər.
“Məhz bu yolla kriminal şəbəkələr pullarının böyük hissəsini qazanır. Bu vəsaitlər sonradan narkotik kimi digər cinayət sxemlərinə yenidən yatırılır və əldə edilən gəlir də cinayət hərəkətlərinə yönəldilir”, - deyə polis izah edir.
2025-ci ilin əvvəlindən bu cür cinayətlərlə bağlı ərizələrin sayı yenidən artmaqdadır - hər həftə 30-a yaxın müraciət daxil olur, onların əksəriyyəti fırıldaqçılıq cəhdləri ilə bağlıdır.
İsveç polisi xəbərdarlıq edir ki, şübhəli SMS-lərdən gələn nömrələrə geri zəng etmək, yad şəxsləri evə buraxmaq və ya onlara qiymətli əşyalar vermək olmaz.
Bölmənin digər xəbərləri
