STRASBURQDA TƏHSİL ALAN DOKTORANTLARIMIZIN ELMİ MÖVZULARI İLƏ BAĞLI DİSKUSSİYALAR TƏŞKİL OLUNUR
AZƏRTAC xəbər verir ki, dekabrın 6-da Strasburqdakı Azərbaycan Evində Robert Şuman Universitetinin beynəlxalq hüquq üzrə doktorantı Xəqani Quliyevin “Xəzər dənizi: geopolitik rəqabət məkanında hüquqi boşluqlar” mövzusunda elmi işinin təqdimatı olacaqdır.
Diaspor ilə iş üzrə Dövlət Komitəsindən bildirmişlər ki, iki hissədən ibarət tədbirin birinci hissəsində X.Quliyev Xəzər dənizinin hüquqi statusu, bölgədəki geopolitik vəziyyət barədə məlumat verəcəkdir. İkinci hissədə isə iştirakçıların sualları cavablandırılacaqdır. Təqdimat diskussiya formasında keçiriləcəkdir. Xəqani Quliyev həmçinin Avropa İnsan Haqları Məhkəməsində hüquqşünas vəzifəsində çalışır.
Dövlət Komitəsindən onu da bildirmişlər ki, Azərbaycan Evinin 2008-2009-cu illər üçün fəaliyyət planında, ayda bir dəfə Strasburqda təhsil alan doktorantların elmi mövzuları barədə təqdimatın təşkili nəzərdə tutulmuşdur.
Bölmənin digər xəbərləri
