Strateji Obyektlərin Mühafizəsi Dövlət Agentliyinin əməkdaşları peşə bayramlarını qeyd ediblər
Bakı, 23 avqust, AZƏRTAC
Azərbaycan Prezidentinin 2008-ci il 21 avqust tarixli Sərəncamı ilə hər il avqustun 23-ü xüsusi dövlət mühafizə xidməti əməkdaşlarının peşə bayramı günü kimi qeyd olunur.
Strateji Obyektlərin Mühafizəsi Dövlət Agentliyindən AZƏRTAC-a verilən məlumata görə, peşə bayramı münasibətilə Agentliyin əməkdaşları Fəxri xiyabana gələrək xalqımızın Ümummilli Lideri Heydər Əliyevin əziz xatirəsini yad edib, məzarı önünə əklil qoyublar. Görkəmli oftalmoloq-alim, akademik Zərifə xanım Əliyevanın da xatirəsi ehtiramla anılıb, məzarı üzərinə gül dəstəsi düzülüb.
Sonra Şəhidlər xiyabanında Vətənimizin müstəqilliyi və ərazi bütövlüyü uğrunda canlarını qurban vermiş oğul və qızlarımızın unudulmaz xatirəsi yad edilərək məzarları üstünə güllər düzülüb, “Əbədi məşəl” abidəsinin önünə əklil qoyulub.
Xüsusi dövlət mühafizə orqanlarının yaranmasının 30-cu ildönümü münasibətilə tədbir Strateji Obyektlərin Mühafizəsi Dövlət Agentliyinin akt zalında davam etdirilib.
Tədbirdə çıxış edən Agentliyin rəisi general-mayor İlqar Abbasov əvvəlcə Agentliyin əməkdaşlarını peşə bayramı münasibətilə təbrik edib. O qeyd edib ki, xüsusi dövlət mühafizəsi orqanlarının yaradılmasından 30 il ötür. Keçən 30 illik dövrdə xüsusi dövlət mühafizəsi orqanları zəngin tarixi və döyüş yolu keçib.
Bildirilib ki, Azərbaycanda dövlət səviyyəsində mühafizə xidmətinin qurulması işinə ilk dəfə 1918-1920-ci illərdə Azərbaycan Xalq Cümhuriyyətinin dövründə başlanılıb. 1919-cu il fevralın 18-də Azərbaycan Demokratik Xalq Cümhuriyyəti Parlamentinin 15-ci iclasında “Azərbaycan Parlamentinin Mühafizə Dəstəsi”nin yaradılması haqqında qanun qəbul edilib və polkovnik-leytenant Nağı Əlizadə Mühafizə Bölüyünün rəisi vəzifəsinə təyin edilib. Azərbaycanda Sovet hakimiyyəti qurulduqdan sonra isə mühafizə xidməti bir çox dəyişikliklərə uğrasa da, zəruri bir qurum kimi öz inkişafını davam etdirib. Mühafizə Xidmətinin müasir tarixinin ən unudulmaz səhifələri Ulu Öndər Heydər Əliyevin adı ilə bağlıdır. 1993-cü il iyunun 15-də xalqın çağırışı ilə Azərbaycanın müdrik oğlu, görkəmli dövlət xadimi Heydər Əliyev yenidən hakimiyyətə qayıtdıqdan sonra bütün sahələrdə əsaslı dəyişikliklər edildi. O cümlədən, 1993-cü il avqustun 23-də Ali Dövlət Hakimiyyət və İdarəetmə Orqanlarını Mühafizə İdarəsi ilə Azərbaycan Respublikasının Milli Qvardiyası bazasında Azərbaycan Respublikasının Ali Dövlət Hakimiyyət və İdarəetmə Orqanlarını Baş Mühafizə İdarəsi yaradıldı.
2002-ci il mayın 6-da Baş Mühafizə İdarəsi Azərbaycan Respublikasının Xüsusi Dövlət Mühafizə Xidməti adlandırıldı.
Ölkəmizdə irimiqyaslı enerji layihələrinin həyata keçirilməsi və həmin enerji layihələrinin təhlükəsizliyinin təmin edilməsi zərurəti ilə əlaqədar 2003-cü il mayın 31-də Xüsusi Dövlət Mühafizəsi Xidmətinin nəzdində İxrac Neft və Qaz Boru Kəmərlərinin Təhlükəsizliyi İdarəsi yaradıldı.
Otuz illik dövrdə xüsusi dövlət mühafizə xidməti orqanlarının əməkdaşları yüksəkvəzifəli şəxslərin təhlükəsizliyinin, o cümlədən, Azərbaycan Respublikası Prezidentinin mühafizəsi və ali dövlət hakimiyyət orqanlarının, neft və qaz kəmərlərinin və onların yerüstü qurğularının, digər strateji əhəmiyyətli obyektlərin etibarlı şəkildə qorunması sahəsində üzərlərinə düşən vəzifələri layiqincə yerinə yetiriblər. Həmçinin Azərbaycan Respublikasının ərazi bütövlüyü uğrunda gedən döyüşlərdə xüsusi dövlət mühafizə xidmətinin hərbi qulluqçuları şərəflə iştirak edib, qəhrəmanlıqlar göstəriblər. Ölkəmizdə ictimai-siyasi sabitliyin qorunması, baş verə biləcək terror-təxribat aktlarının qarşısının qətiyyətlə alınması kimi ən mühüm sahələrdə xidmətin hərbi qulluqçularının daim nümunəvi fəaliyyəti və fədakarlığı diqqəti cəlb edib.
Milli dövlətçiliyimizin qorunması işində mühüm yer tutan xüsusi mühafizə sistemində çalışan əməkdaşların fədakar və nümunəvi fəaliyyəti Azərbaycan Respublikasının Prezidenti, Ali Baş Komandan İlham Əliyev tərəfindən yüksək qiymətləndirilib. Məhz xidmətin maddi-texniki bazasının gücləndirilməsi, əməkdaşların sosial rifahı, mənzil şəraitinin yaxşılaşdırılması, hər il əməkdaşların ali dövlət mükafatları ilə təltif olunması, yubiley medallarının təsis edilməsi həmin diqqət və qayğının bariz nümunəsidir.
Prezident İlham Əliyevin 2020-ci il 16 mart tarixli Fərmanı ilə xüsusi mühafizə sahəsində dövlət siyasətinin daha da təkmilləşdirilməsi məqsədilə Xüsusi Dövlət Mühafizə Xidməti ləğv edilib və yeni 3 qurum yaradılıb. Həmin qurumlardan biri kimi Strateji Obyektlərin Mühafizəsi Dövlət Agentliyi ixrac neft və qaz boru kəmərlərinin mühafizəsini, o cümlədən, mühafizə olunan şəxslərin və əksər strateji obyektlərin təhlükəsizliyinin təmin edilməsi, mühafizə olunan şəxslər və obyektlərə qarşı ola biləcək təhlükələrin qarşısının alınması sahəsində qanunamüvafiq qaydada fəaliyyət göstərir. Beynəlxalq terrorizmin və sui-qəsdlərin geniş vüsət aldığı vaxta mühafizə işinin təkmilləşdirilməsi, elm və texnikanın nailiyyətlərindən istifadə olunması, yüksək peşəkarlığa malik kadrların hazırlanması Agentliyin qarşısında duran əsas vəzifələrdir. Agentliyin kadr siyasəti həyata keçirilərkən müharibə iştirakçılarının Agentlikdə həqiqi hərbi xidmətə qəbul edilməsinə xüsusi diqqət yetirilib, son bir il ərzində 63 nəfər İkinci Qarabağ müharibəsi iştirakçısı hərbi xidmətə qəbul edilib.
Prezident İlham Əliyevin rəhbərliyi ilə uğurla həyata keçirilən islahatların və stabilliyin qorunub saxlanılması ilə bağlı mühafizə sahəsində qarşımıza qoyulan vəzifələrin yerinə yetirilməsi ilə əlaqədar Strateji Obyektlərin Mühafizəsi Dövlət Agentliyinin əməkdaşları döyüş tapşırıqlarının yerinə yetirilməsində daha fəal mövqe tutmalı, dövlətə və dövlətçilik ideyalarına daha sədaqətlə xidmət göstərməlidir.
İlqar Abbasov qarşıda duran şərəfli və məsuliyyətli vəzifələrin icrası üçün Agentliyinin əməkdaşlarına tükənməz fiziki və mənəvi qüvvə arzulamaqla peşə bayramı münasibətilə şəxsi heyəti təbrik edib. Hər birinə möhkəm cansağlığı, uzun ömür, xidməti fəaliyyətində uğurlar, ölkəmizə sülh və əmin-amanlıq arzulayıb.
Sonda Agentliyin xidmətdə fərqlənən və vəzifələrini layiqincə yerinə yetirən hərbi qulluqçuları “Azərbaycan Respublikasının strateji obyektlərin mühafizəsi orqanlarının yaradılmasının 30 illiyi” yubiley medalı, digər medal və mükafatlarla təltif ediliblər.
Bölmənin digər xəbərləri
