Sumqayıt internatında tərbiyə alanlar Beynəlxalq Yer Gününü qeyd etmişlər
Sumqayıt, 23 aprel (AZƏRTAC). Sumqayıtda fiziki və əqli qüsurlu uşaqlar üçün ixtisaslaşdırılmış internatda ARDNŞ-in “Azərikimya” İstehsalat Birliyinin təşkilati dəstəyi ilə Beynəlxalq Yer Gününə həsr edilmiş “Ekologiya uşaqların gözü ilə” adlı bayram tədbiri keçirilmişdir.
Tədbirdən əvvəl qonaqlar - “Azərikimya” İB-nin Müşahidə Şurasının sədri, Milli Məclisin deputatı Muxtar Babayev, Respublika Ekologiya və Təbii Ehtiyatlar Nazirliyinin 4-cü ərazi bölməsinin rəisi Firdovsi Həsənov, şəhər təhsil şöbəsinin müdiri, Respublikanın Əməkdar Müəllimi Vidadi Bağırov, Respublika Qızıl Aypara Cəmiyyətinin şəhər şöbəsinin sədri Mətanət Məhərrəmova və Sumqayıt ictimaiyyətinin nümayəndələri məktəbyanı sahədə tinglər əkilməsində iştirak etmişlər. İnternatın şagirdləri tərbiyəçilərlə birlikdə məktəbyanı sahədəki ağaclarda quş yuvaları düzəltmişlər. Sumqayıtdakı “Təfəkkür” liseyində təhsil alan gənc ekoloqlar təbiətin qorunması tədbirlərini dəstəkləyən ənənəvi imza toplamaqla məşğul olmuşlar. Lisey şagirdlərinin bu təşəbbüsü bayramın iştirakçıları və qonaqları tərəfindən dəstəklənmiş, onlar Ana Torpağı qorumaq barədə şüarlar yazılmış plakatları imzalamışlar.
Şagirdlər internatın binasında möcüzəli və əsrarəngiz təbiət aləmini yaratmışlar. Burada meşənin bir guşəsi yaradılmış, insanın onu əhatə edən dünya, yaşadığı təbii mühit barədə qayğı göstərməsinin vacibliyini öz əl işlərində əks etdirməyə çalışan gənc rəssamlar üçün yaradıcılıq emalatxanası təşkil edilmişdir.
Məktəbin akt zalında hamını əsl şou gözləyirdi. Məktəblilər təbiətin mühafizəsi mövzusunda mahnılar və şeirlər ifa etmiş, tematik səhnəciklər göstərmişlər.
Tamaşa Ana Torpağın məktəblilərə ünvanlanmış məktubu və şagird Aqil Quliyevin həmin məktuba cavabından başlandı. Tamaşaçılar nitq sarıdan problemləri olan şagirdlərin təqdim etdiyi maraqlı pantomimi böyük həyəcanla qarşıladılar.
Növbəti səhnəcik “Meşədə məhkəmə” adlanırdı. Su, Hava və heyvanat aləmi insandan çox narazılıq edir, onu amansızlıqda, məsuliyyətsizlikdə ittiham edərək köməyə çağırırdı. Bəli, nitq qabiliyyəti təkcə insana verilməmişdir. Kitablar da danışa bilirlər. Elə kitab vardır ki, o, sadəcə danışmır, qışqırır, haraya çağırır. Bu, Qırmızı Kitabdır, lakin təəssüf ki, insanların heç də hamısı bu harayı eşitmir.
Qırmızı rəng qadağa əlamətidir. Dünyada bütün insanlar bilir ki, qırmızı işıq insanı dayanmağa, əl saxlamağa çağırır. Bu rəng sanki deyir: ey insan, fikirləş, nə üçün planetdə heyvanların və bitkilərin sayı günbəgün azalır? Sən özündən sonra bir qalaq zibil yox, əkilmiş bir ağac, bir təmiz çay, xilas edilmiş bir quşcuğaz qoyub getməyə çalış!
Bu tədbir həqiqətən parlaq, faydalı və yaddaqalan bir bayram oldu. Ən başlıcası, uşaqlar anladılar ki, onlar da planetə kömək edə bilərlər. Bu, bütün uşaqlar üçün, xüsusən müxtəlif səbəblər üzündən bu internatda oxuyanlar üçün çox vacibdir.
######
Bölmənin digər xəbərləri
