Suriya 14 ildən sonra ilk dəfə SWIFT vasitəsilə tranzaksiya həyata keçirib
Bakı, 19 iyun, AZƏRTAC
Suriya 14 illik vətəndaş müharibəsindən sonra ilk dəfə beynəlxalq bank əməliyyatını SWIFT sistemi vasitəsilə həyata keçirib.
AZƏRTAC xəbər verir ki, bu barədə ölkənin Mərkəzi Bankının rəhbəri Əbdülqadir Xusrie cümə axşamı günü bəyan edib. Onun sözlərinə görə, bu addım Suriyanın qlobal maliyyə sisteminə yenidən inteqrasiya olunmaq səylərində mühüm mərhələdir.
Mərkəzi Bank rəhbəri Dəməşqdə “Reuters” agentliyinə verdiyi açıqlamasında bildirib ki, bazar günü Suriya bankından İtaliyaya birbaşa kommersiya əməliyyatı həyata keçirilib. Onun sözlərinə görə, yaxın həftələrdə ABŞ bankları ilə də əməliyyatlara başlanması gözlənilir.
“Bundan sonra bu cür əməliyyatlar üçün qapı artıq açıqdır”, – deyə o bildirib.
Qərb ölkələrinin tətbiq etdiyi sanksiyalar səbəbindən Suriya bankları vətəndaş müharibəsi dövründə dünya maliyyə sistemindən faktiki olaraq təcrid edilmişdi.
Suriya beynəlxalq əlaqələri bərpa etmək üçün bir sıra addımlar atıb. Bu prosesin kulminasiya nöqtəsi isə keçid dövrü Prezidenti Əhməd əl-Şəara ilə ABŞ Prezidenti Donald Tramp arasında Ər-Riyadda keçirilən may görüşü olub. Həmin görüşdən sonra ABŞ Suriya ilə bağlı sanksiyaların əhəmiyyətli hissəsini yumşaldıb, lakin Konqresdə bəzi şəxslər sanksiyaların tamamilə ləğv edilməsini tələb edirlər. Avropa da iqtisadi sanksiya rejiminin başa çatdığını elan edib.
BMT-nin məlumatına görə, müharibədən çıxmış Suriyanın iqtisadiyyatını bərpa etmək və əhalinin əksəriyyətinin yaşadığı yoxsulluqdan çıxması üçün ölkə Qərb maliyyə institutları vasitəsilə böyük məbləğdə vəsait transferlərinə ehtiyac duyur. Hazırda ölkə əhalisinin on nəfərindən doqquzu yoxsulluq içində yaşayır.
Bölmənin digər xəbərləri
