SURİYA ƏRƏB RESPUBLİKASININ PREZİDENTİ BƏŞŞAR ƏL-ƏSƏDİN AZƏRBAYCANA RƏSMİ SƏFƏRİ
ALİ QONAĞIN ŞƏRƏFİNƏ
Bakı, 9 iyul (AZƏRTAC). Xəbər verdiyimiz kimi, iyulun 8-də “Gülüstan” sarayında Azərbaycan Respublikasının Prezidenti İlham Əliyevin və xanımı Mehriban Əliyevanın adından Suriya Ərəb Respublikasının Prezidenti Bəşşar əl-Əsədin və xanımı Əsma əl-Əsədin şərəfinə rəsmi ziyafət təşkil edilmişdir.
Dövlət başçıları ziyafətdə nitq söyləmişlər.
Azərbaycan Prezidenti İlham Əliyev qonaqları salamlayaraq dedi:
-Hörmətli cənab Prezident!
Hörmətli xanım Əsma əl-Əsəd!
Xanımlar və cənablar!
İlk növbədə, cənab Prezident, mən Sizi və rəhbərlik etdiyiniz nümayəndə heyətini Azərbaycanda bir daha səmimiyyətlə salamlayıram. Azərbaycana xoş gəlmisiniz. Bu Sizin Azərbaycana ilk səfərinizdir. Düşünürəm ki, bu səfəriniz ikitərəfli münasibətlərimizdə mühüm hadisə olacaq və əlaqələrimizin inkişafına güclü təkan verəcəkdir.
Mən bu gün keçirilmiş görüşlərə, aparılmış danışıqlara və fikir mübadiləsinə, habelə imzalanmış sənədlərə, sabah təşkil olunacaq biznes foruma xüsusi əhəmiyyət verirəm və onları yüksək qiymətləndirirəm. Suriya ilə Azərbaycan arasında əlaqələrin dərin tarixi kökləri vardır. Bizi uzun əsrlər ərzində təşəkkül tapmış münasibətlər bağlayır. İslam dini xalqlarımızın tarixində çox mühüm rol oynamış, müştərək mənəvi dəyərlər formalaşdırmışdır. Azərbaycanın və Şərqin böyük mütəfəkkir şairi İmadəddin Nəsimi, həmçinin Hələb şəhərində yaşayıb-yaratmışdır. Nəsiminin əsərləri xalqlarımızın mənəvi sərvətidir. Ümummilli liderlərimiz, mərhum prezidentlər Heydər Əliyev və Hafiz əl-Əsəd arasındakı görüşlər və şəxsi dostluq münasibətləri ölkələrimizin yaxınlaşmasında müstəsna əhəmiyyət kəsb etmişdir. Beynəlxalq və regional təşkilatlar, o cümlədən İslam Konfransı Təşkilatı çərçivəsində əməkdaşlığımızdan razıyam. Bu əməkdaşlıq İslam həmrəyliyinin möhkəmlənməsi, İslam ümmətinin problemlərinin aradan qaldırılması baxımından xüsusilə əhəmiyyətlidir. 2009-cu ildə İslam mədəniyyətinin paytaxtı elan edilmiş Bakı bu istiqamətdə səylərini əsirgəməyəcəkdir.
Mən Suriya ilə Azərbaycan arasında əməkdaşlığın genişlənməsinin tərəfdarıyam. Biz bu əməkdaşlığı inkişaf etdirmək üçün Dəməşqdə səfirliyimizi açdıq. Ölkələrimiz arasında bir sıra sahədə, xüsusilə də energetika, mədən sənayesi, kənd təsərrüfatı, turizm, təhsil, səhiyyə sahələrində əməkdaşlığın yaxşı perspektivləri vardır.
Bu gün Azərbaycanın neft və qaz ehtiyatlarının istismarı və enerji daşıyıcılarının dünya bazarlarına nəqli böyük əhəmiyyətə malikdir. Artıq fəaliyyət göstərən Bakı-Tbilisi-Ceyhan neft, Bakı-Tbilisi-Ərzurum qaz kəmərlərinin bütün regionun inkişafına və beynəlxalq enerji təhlükəsizliyinə töhfəsi heç kimdə şübhə doğurmur. İnanıram ki, Bakı-Tbilisi-Qars dəmir yolu layihəsinin həyata keçməsi əməkdaşlığımızın genişlənməsinə və ticarət dövriyyəsinin artmasına şərait yaradacaqdır. Həyata keçirilən siyasi və iqtisadi islahatlar Azərbaycanın sürətli inkişafına güclü təkan vermiş, yeni investisiya imkanları yaratmış, iqtisadi potensialın güclənməsini təmin etmişdir. Atılan addımların nəticəsidir ki, son beş il ərzində Azərbaycan iqtisadiyyatı 2,6 dəfə artmışdır.
Bizim regionda ən böyük təhlükə Ermənistan-Azərbaycan, Dağlıq Qarabağ münaqişəsinin hələ də həll olunmamasıdır. Ermənistanın hərbi təcavüzü və etnik təmizləmə siyasəti nəticəsində Azərbaycan ərazisinin 20 faizi işğal olunmuş, ölkədə bir milyondan çox qaçqın və məcburi köçkün yaranmışdır. Ermənistanın işğal etdiyi Azərbaycan ərazilərində qədim tarix və mədəniyyət abidələri, məktəblər, muzeylər, məscidlər dağıdılmış, dünya və İslam sivilizasiyasının nadir inciləri yer üzündən silinmişdir. Münaqişə ilə bağlı BMT Təhlükəsizlik Şurasının dörd qətnaməsi, ATƏT, İKT, Avropa Şurası Parlament Assambleyası, NATO və digər beynəlxalq təşkilatların müvafiq qərar və qətnamələri vardır. Bu münaqişə yalnız beynəlxalq hüquq normalarına uyğun, Azərbaycanın ərazi bütövlüyü çərçivəsində həll olunmalıdır.
Hörmətli cənab Prezident, Azərbaycana rəsmi səfərinizə böyük əhəmiyyət verdiyimi bir daha ifadə edir, Sizə və bütün Suriya xalqına xoşbəxtlik, səadət, firavanlıq arzulayıram.
X X X
Suriya Prezidenti Bəşşar əl-Əsəd təşəkkür edərək dedi:
-Azərbaycan Respublikasının Prezidenti cənab İlham Əliyev!
Xanım Mehriban Əliyeva!
Xanımlar və cənablar!
İcazə verin mənim, xanımımın və nümayəndə heyətinin Azərbaycanda səmimiyyətlə qarşılanmasına görə dərin minnətdarlığımı və təşəkkürümü bildirim. Bu gün dost və qədim ölkənizdə olmağımdan çox məmnunam.
Suriya ilə Azərbaycanı bir-birinə tarix, sivilizasiya, mədəniyyət və əməkdaşlıq telləri bağlayır. Bu münasibətlərin bünövrəsi hələ İpək Yolu əsrində, müstəqillik qazandığımızdan əvvəlki və sonrakı dövrlərdə qoyulmuşdur.
Prezident Bəşşar əl-Əsəd əcdadlarımız tərəfindən qoyulmuş bünövrə üzərində yaradılan əməkdaşlığın xalqlarımızın və ölkələrimizin sülh, təhlükəsizlik, sabitlik və inkişaf şəraitində yaşamasına və inkişafına xidmət etdiyini bildirdi. Suriya Prezidenti Azərbaycana səfərinin iki ölkə arasında əlaqələrin daha da genişlənməsi zərurətindən irəli gəldiyini əsaslandırdı. Ali qonaq əməkdaşlığımızın tarixi və perspektivləri barədə fikirlərini söyləyərək dedi:
-Ölkələrimiz hələ İpək Yolu dövründə Asiya ilə Avropanı birləşdirən iki mühüm körpü rolunu oynamış, mədəniyyətlərin yaxınlaşması prosesini gücləndirmiş, bölgəmizdəki sivilizasiyaları tanıtmış, bu da öz növbəsində ölkələrimizə və xalqlarımıza böyük təcrübə qazandırmışdır, xalqların adətləri, ənənələri və mədəniyyətlərindən ibarət maarif bazası yaratmışdır.
Hələ əlaqə qurmaq imkanlarının məhdud olduğu əsrlərdə aramızda münasibətlər mövcud olmuşsa, bu gün bu münasibətlərin bütün sahələrdə gücləndirilməsi naminə səy göstərməyimiz bir aksiomdur.
Əminik ki, Suriya ilə Azərbaycan arasında iqtisadi əməkdaşlığın, xüsusən də yerüstü, dəniz və hava nəqliyyatı yollarının inkişaf etdirilməsi, neft və qaz sahələrindəki strateji layihələrin birgə qurulması vasitəsilə iki ölkə arasındakı ticarət mübadiləsinin və sərmayə qoyuluşunun artırılması üçün real fürsət vardır. Bunun üçün birgə niyyət vardır və əməkdaşlığın gücləndirilməsi üzrə geniş imkanlar mövcuddur. Əminəm ki, Azərbaycanın Qafqaz, Suriyanın isə Yaxın Şərq bölgələrində mühüm strateji mövqelərə malik olması ölkələrimizə Asiya ilə Avropa arasında, Yaxın Şərqlə Qafqaz arasında birləşdirici körpü olmaq imkanı verir.
Əziz dost Prezident İlham Əliyev,
Xanımlar və cənablar!
İqtisadi münasibətlərə diqqət yetirməyimizlə bərabər, deməliyəm ki, Yaxın Şərq, Qafqaz və Balkan bölgələrindəki siyasi münasibətlər və sabitlik dünyada təhlükəsizlik və sabitlik üçün daim böyük önəm kəsb etmişdir.
Yaxın Şərq bölgəsindəki təcrübəmiz birmənalı şəkildə onu sübut etdi ki, regiondakı problemlərin həlli üçün vaxt o qədər də yetərli amil deyildir. Bunun üçün xoş məram, bütün tərəflər arasında səylərin birliyi tələb olunur və bu, çözüm yollarının tapılmasının bölgə xalqlarına və dünyaya nə dərəcədə müsbət təsir edəcəyinin vacibliyinə inamdan irəli gəlir. Yaxın Şərqdə sülhün və sabitliyin bərqərar olunması yolunda Suriya da öz gücünü əsirgəmir. Lakin biz sülh yolunda daim inadcıllıq və təkəbbürlük divarı ilə, İsrailin sülhü inkar etməsi ilə, sülhə çağırışlar, o cümlədən ərəb sülh çağırışı müqabilində təcavüzkar müharibələrlə, o cümlədən Livana və Qəzzəyə qarşı müharibələrlə, işğal olunmuş ərazilərdəki ərəb xalqına qarşı aparılan ardı-arası kəsilməyən təcavüzlərlə, Qüdsü yəhudiləşdirmək cəhdləri ilə, yaşayış məntəqələrinin genişləndirilməsi, Fələstin xalqının blokadası və bu xalqın yaşamaq hüququndan məhrum olunması cəhdləri ilə qarşılaşırıq.
Suriya “sülh əvəzinə torpaq” prinsipinə deyil, beynəlxalq norma və qanunlara, hüquqların öz sahiblərinə qaytarılması prinsipinə istinadən sülhün bərqərar olunması yolunda daim çalışacaqdır.
Qafqazda və Orta Asiyadakı hadisələrin gedişini, xüsusən də Dağlıq Qarabağ probleminin, Ermənistan-Azərbaycan münasibətlərinin beynəlxalq norma və qanunlar əsasında və bütün tərəflərin hüquqlarının qorunması şərti ilə həlli yollarının dialoq vasitəsilə tapılması istiqamətində göstərdiyiniz səyləri biz böyük diqqətlə izləyirik və problemin uzun, sürəkli olmaması üçün dialoq prosesinin tezləşdirilməsi zərurətinə inanırıq. Təcrübəmiz göstərir ki, problemin həlli müddəti uzandıqca, onu çözmək imkanları da mürəkkəbləşir.
Bu prizmadan yanaşaraq və hər iki tərəflə əla münasibətlərimiz olduğu üçün Ermənistan-Azərbaycan, Dağlıq Qarabağ münaqişəsinin həlli ilə bağlı lazımi yardım göstərməyə hazır olduğumuzu bildiririk.
Sonda ümidvar olduğumu bildirirəm ki, bu səfər dost ölkələrimiz arasında əməkdaşlıq münasibətlərinin bütün səviyyələrdə gücləndirilməsinə təkan verəcək və fürsətdən istifadə edərək Sizi Suriya ilə Azərbaycan arasındakı münasibətlərin daha da inkişaf etdirilməsi məqsədi ilə ən yaxın vaxtda Suriyaya səfərə dəvət edirəm.
Bir daha qonaqpərvərliyinizə görə öz təşəkkürümü bildirir, Sizə cansağlığı, xoşbəxtlik, dost Azərbaycan xalqına davamlı tərəqqi və çiçəklənmə arzulayıram.
######
 |
 |
Bölmənin digər xəbərləri
