TAHİR ABDULLA OĞLU ABDULLAYEV
Tahir Abdullayev 1915-ci il avqustun 25-də Naxçıvan şəhərində anadan olmuşdur. O, 1933-cü ildə Nəriman Nərimanov adına Sənaye Texnikumunu bitirmişdir. Memarlığa olan marağı Tahir Abdullayevi həmin il Azərbaycan Sənaye İnstitutunun memarlıq-tikinti fakültəsinə gətirmişdir. İnstitut təhsilini 1939-cu ildə memarlıq ixtisası üzrə başa çatdırandan sonra Tahir Abdullayev həmin ildən 1941-ci ilə qədər Bakı Şəhər İcraiyyə Komitəsinin Memarlıq Planlaşdırma İdarəsində çalışmış, 1941-1944-cü illərdə müxtəlif tikinti idarələrində baş mühəndis vəzifəsini tutmuş, 1944-cü ildən 1951-ci ilədək olan dövrdə Şəki şəhərinin baş memarı işləmişdir. 1951-ci ildən 1992-ci ilə qədər — 40 ildən artıq bir müddət ərzində Tahir Abdullayev Azərbaycan Dövlət Layihə İnstitutunun direktoru kimi fəaliyyət göstərmiş, 1993-cü ildən ömrünün sonunadək isə “Bakıdövlətlayihə” İnstitutunun əməkdaşı olmuşdur.
Tahir Abdullayev ölkəmizdə müasir memarlıq məktəbinin yaranıb inkişaf etməsində mühüm xidmətləri olan sənətkar kimi yaxşı tanınırdı. O, həyatının yarım əsrdən artıq bir dövrünü quruculuq və abadlıq işlərinə həsr etmiş, respublikada milli memarlıq ənənələrinin davam etdirilib zənginləşdirilməsi işində öz bilik və bacarığını əsirgəməmişdir. Azərbaycanın Bakı, Sumqayıt, Naxçıvan və başqa şəhərlərində bir çox təhsil və mədəniyyət ocağı, inzibati bina, yaşayış kompleksi layihələrinin müəllifi Tahir Abdullayev olmuşdur. Onun heykəltəraşlarla sıx əməkdaşlığı sayəsində ölkəmizin görkəmli şəxsiyyətlərinə ucaldılmış möhtəşəm abidələr bu gün də Azərbaycan paytaxtının və digər bölgələrin meydan və küçələrini bəzəyir.
1940-cı ildən Azərbaycan Memarlar İttifaqının üzvü olan Tahir Abdullayev uzun illər ərzində həmin ittifaqın rəhbərliyində təmsil olunmuşdu. Bu təşkilatın ölkəmizdə çoxşaxəli fəaliyyətinin təşəkkül tapması və inkişafında, Azərbaycan memarlıq sənətinin nailiyyətlərinin təbliğində Tahir Abdullayevin böyük əməyi olmuşdur.
Tahir Abdullayevin Azərbaycan milli memarlığı qarşısındakı xidmətləri yüksək qiymətləndirilmişdir. O, bir sıra orden və medallarla təltif olunmuş, fəxri adlara və mükafatlara layiq görülmüşdür.
Görkəmli memar, bacarıqlı təşkilatçı, səmimi və qayğıkeş insan Tahir Abdullayevin əziz xatirəsi onu tanıyanların qəlbində həmişə yaşayacaqdır.
Allah rəhmət eləsin!
İlham Əliyev, Murtuz Ələsgərov,
Artur Rasizadə, Ramiz Mehdiyev,
Elçin Əfəndiyev, Abid Şərifov,
Hacıbala Abutalıbov, Fatma Abdullazadə,
Nizami Xudiyev, Şair Həsənov,
Ömər Eldarov, Rasim Əfəndiyev,
Gülçöhrə Məmmədova, Hafiz Əmirxanov,
Şamil Fətullayev,Tələt Xanlarov,
Yuzef Qədimov, Abbas Ələsgərov,
Yaşar Mirzəzadə.
