Tamam Cəfərova: Ərdoğanın liderliyi ilə Türkiyə regional gücdən qlobal söz sahibinə çevrilib
Bakı, 15 aprel, AZƏRTAC
Azərbaycan ilə Türkiyə arasında dostluq və qardaşlıq münasibətlərinin tarixinə nəzər salsaq görərik ki, ötən illər ərzində ölkələrimiz arasında əlaqələr tarixinin ən güclü və sarsılmaz dövrünə qədəm qoyub. Türkiyə ilə Azərbaycan arasında münasibətlər Prezident İlham Əliyevin və Prezident R.T.Ərdoğanın hakimiyyətləri dövründə daha da inkişaf edib və strateji müttəfiqlik səviyyəsinə çatıb.
Bu fikirləri AZƏRTAC-a açıqlamasında Milli Məclisin üzvü Tamam Cəfərova söyləyib.
T.Cəfərova diqqətə çatdırıb ki, Türkiyə Cümhuriyyətinin 100 illik tarixində mövcud hakimiyyət daha uzunömürlü və qətiyyətli olub. 1991-ci ildən 2002-ci ilədək Türkiyədə 7 dəfə hökumət dəyişib. Bundan əvvəl isə Türkiyə hərbi çevrilişlərin baş verdiyi ölkə olaraq tanınırdı. Çevrilişlərdən sonra isə Türkiyə hər iki ildən bir dəyişən, bəzən bir neçə ay davam edən hökumətlər ölkəsi idi. Əvvəlki Türkiyə supergüclərin gündəliyinə uyğun hərəkət edən bir ölkə olduğu halda, Ərdoğan dövründə Türkiyə özünün gündəliyi olan müstəqil aktor mövqeyinə yüksəldi. Artıq heç bir güc Türkiyəyə nə etməli olduğunu diktə edə bilmir. Türkiyənin maraqları üçün lazımi qərarlar xarici mərkəzlərdə deyil, Ankarada qəbul edilir. 21 il ərzində Rəcəb Tayyib Ərdoğanın liderliyi ilə Türkiyə regional gücdən qlobal söz sahibinə çevrilib.
Deputat qeyd edib ki, Ərdoğan iqtidarı dövründən başlayaraq Türkiyə iqtisadi sahə başda olmaqla, bir çox sahədə inqilabi xarakterli addımlar atmağa başlayıb. Təhsildən tutmuş iqtisadi təşəbbüslərə qədər hər sahədə bərabər imkanları təmin edən işlər görülüb. Vətəndaşların inkişaf etmiş ölkələrdəki bütün imkanlara sahib ola biləcəkləri, üstəlik, bunun güclü sosial dövlət çətiri altında asanlıqla əldə ediləcəyi bir infrastruktur yaradılıb.
“Ərdoğanın hakimiyyəti dövründə Türkiyənin inkişafı sahəsində əldə edilmiş uğurlar danılmazdır və göz qabağındadır. Təhsil sahəsində 10,3 milyard türk lirəsi olan illik büdcə 304 milyard türk lirəsindən çox artırılıb. Ümumi daxili məhsul 238 milyard ABŞ dollarından 1 trilyon ABŞ dollarına çatıb. Satınalma gücü nisbətinə görə Türkiyə dünyanın ən böyük 11-ci, Avropanın 4-cü iqtisadiyyatı səviyyəsinə yüksəlib, ixracat 36 milyard dollardan 250 milyard dollara qədər artıb, dünyanın 228 ölkə və bölgəsinə ixracat həyata keçirilməyə başlanılıb. Xarici ticarət həcmi 500 milyard dollara çatdırılıb. Müdafiə sənayesi üzrə Türkiyə öz tələbatını qarşılamaqdan başqa İHA, SİHA, Akıncı, quru vasitələri, dəniz platformaları başda olmaqla, 170 ölkəyə müdafiə sənayesi məhsulları ixrac edən bir ölkə səviyyəsinə qalxıb, sənaye və texnologiya istiqamətində qurulan 152 yeni mütəşəkkil sənaye zonası, 29 sənaye zonası və 94 texnoparkla ölkənin istehsal gücü artırılıb, yerli avtomobil TOGG-un istehsalı başa çatdırılıb və vətəndaşlara təqdim edilib, Qara Dənizdə ümumilikdə 540 milyard kubmetr təbii qaz ehtiyatı kəşf edilib. Bu kəşflərdən sonra Türkiyənin enerji tələbatının mühüm bir hissəsi yerli mənbələrdə təmin edilməyə başlanacaq”, - deyə T.Cəfərova qeyd edib.
Bu gün Türkiyə Avropanın enerji təhlükəsizliyinə öz töhfəsini verdiyini diqqətə çatdıran deputat onun TANAP və TAP kəmərləri vasitəsilə Azərbaycan qazının Avropaya çatdırılmasında mühüm rol oynadığını bildirib.
T.Cəfərova vurğulayıb ki, daxili siyasətlə yanaşı, Ərdoğanın rəhbərliyi dövründə Türkiyənin dünyadakı yeri və əhəmiyyəti, bütün beynəlxalq platformalarda nüfuzu inanılmaz dərəcədə yüksəlib. Türkiyənin müstəqil xarici siyasət həyata keçirməsini təmin edən Ərdoğan qardaş ölkəni dünyada söz sahibi olan, öz siyasətini həyata keçirən bir ölkəyə çevirə bilib.
Deputat bildirib ki, Azərbaycan-Türkiyə qardaşlığı Rəcəb Tayyib Ərdoğan dövründə daha da dərinləşib. Hər iki ölkənin dövlət və hökumət başçılarının, eləcə də siyasi, iqtisadi, ticarət, elm, təhsil, mədəniyyət və digər sahələr üzrə aidiyyəti qurumların rəhbərlərinin qarşılıqlı səfərləri ikitərəfli əməkdaşlığın inkişafında əhəmiyyətli rol oynayır.
“Azərbaycan Prezidenti İlham Əliyev ilə Türkiyə Prezidenti Ərdoğan sayəsində Türkiyə-Azərbaycan münasibətləri tarixin ən yüksək inkişaf səviyyəsinə yüksəlib. Qarabağın düşmən işğalından azad edilməsi üçün aparılan Vətən müharibəsində “Bir millət, iki dövlət” prinsipinə layiq bir mövqe nümayiş etdirildi, Azərbaycana böyük siyasi və mənəvi dəstək verildi, torpaqlarımız işğalçılardan təmizləndi.
Türkiyə Azərbaycanın haqq işinə hər zaman dəstək verən ölkələrdəndir. İstər Vətən müharibəsində, istərsə də Qarabağ və Şərqi Zəngəzurda quruculuq prosesində Türkiyənin dəstəyi hər zaman hiss olunur.
Deputat vurğulayıb ki, Azərbaycan Prezidenti İlham Əliyev və Türkiyə Prezidenti R.T.Ərdoğanın səyləri nəticəsində Türk Dövlətləri Təşkilatı beynəlxalq təşkilatlar arasında nüfuzlu və mühüm bir rol oynamağa başlayıb. Türk birliyinin təmin olunması istiqamətində Ərdoğan dövründə atılan addımlar bundan əvvəlki heç bir hakimiyyətin edə bilmədiyi qədər böyük olub.
“Təbii ki, seçmək hüququ Türkiyə vətəndaşlarındadır. İnanırıq ki, qardaş dövlətin vətəndaşları doğru seçimləri ilə ölkələrinin inkişafını dəstəkləyəcək, ədalətə, inkişafa və tərəqqiyə səs verəcəklər”, - deyə Tamam Cəfərova vurğulayıb.
Bölmənin digər xəbərləri
