Bakı, 19 dekabr, AZƏRTAC

2023-cü ilin sosial-iqtisadi nəticələrinə görə, ölkəmizin dayanıqlı inkişafı təmin edildi, qeyri-neft sektoru daha da inkişaf etdi. İşğaldan azad edilmiş Qarabağ və Şərqi Zəngəzur iqtisadi regionlarının bərpası, iqtisadi və sosial sahələrdə islahatlar davam etdirildi.

Bu fikirləri AZƏRTAC-a açıqlamasında AMEA-nın A.A.Bakıxanov adına Tarix İnstitutunun Azərbaycan tarixi şöbəsinin aparıcı elmi işçisi tarix üzrə fəlsəfə doktoru, dosent Alı Balayev söyləyib. O bildirib ki, maliyyə sektorundakı nizam-intizam möhkəmləndirilib. Vergi, gömrük orqanlarında islahatlar davam etdirilib və bu mərhələdə şəffaflıq təmin edilib.

“Cari ildə dövlət büdcəsi rekord həddə - 36 milyard manatdan çox səviyyəyə qalxdı. 1,8 milyard manat Qarabağ və Şərqi Zəngəzur iqtisadi regionunun bərpa edilməsinə, 1,1 milyard manat isə hərbi potensialımızın güclənməsinə istiqamətləndirildi. Ümumi daxili məhsul 60 milyard manatdan çox təşkil edib. Xarici ticarət balansı xeyli artıb.

Makroiqtisadi sabitlik uzun illər ərzində təmin edilib. Milli manatın məzənnəsi səkkiz ildir ki, sabitdir və bu da dünya praktikasında, xüsusilə indiki şəraitdə nadir hadisələrdən biridir. Bizdə isə həm minimum əməkhaqları, həm minimum pensiyalar müntəzəm olaraq artırılır. Bununla paralel olaraq manat sabitdir.

2023-cü ilin sonunda inflyasiya birrəqəmli səviyyəyə düşüb. Hərbi qüdrətimiz artıb, Qarabağ və Şərqi Zəngəzur regionu bərpa edilir. “Böyük Qayıdış” proqramı ardıcıllıqla həyata keçirilir. Beş yaşayış məntəqəmizdə - bir şəhər və dörd kəndimizdə vətəndaşlar öz dədə-baba torpaqlarında tam məskunlaşıblar. Bütövlükdə “Böyük Qayıdış” proqramının birinci mərhələsində 100 yaşayış məntəqəsinin yenidən qurulması nəzərdə tutulub. Prezident İlham Əliyev 30 yaşayış məntəqəsinin - 8 şəhər, 22 qəsəbə və kəndin təməlinin qoyulmasında iştirak edib. Baş planlar hazırlanaraq təsdiqlənib, bir çox yerlərdə fəal inşaat işləri aparılır”, - deyə Alı Balayev bildirib.

Qarabağ və Şərqi Zəngəzur regionunun bərpası üçün dövlət tərəfindən təqribən 12 milyard manata qədər vəsaitin xərclənməsinin təmin edildiyini söyləyən Alı Balayev Heydər Əliyev Fondunun məscid və məktəbləri yenidən inşa və ya əsaslı şəkildə bərpa etdiyini qeyd edib.

“Silahlı Qüvvələrimizin modernləşdirilməsi, bu sahədə islahatların dərinləşdirilməsi, yeni silahlı birləşmələrin yaradılması və təkmilləşdirilməsi istiqamətində, o cümlədən ən müasir silahların, texnikaların alınması istiqamətində işlər plan üzrə gedir. İkinci Qarabağ müharibəsindən sonra Silahlı Qüvvələrimizdə aparılan islahatlar hələ başa çatmayıb. Biz öz Silahlı Qüvvələrimizi ən qabaqcıl orduların səviyyəsinə çatdırmalıyıq. Struktur islahatları, idarəetmə və özünümüdafiə qabiliyyəti nöqteyi-nəzərindən biz elə güc yaradırıq ki, yerləşdiyimiz coğrafiyada özümüzü tam əmin hiss edə bilək. Azərbaycanın əlverişli coğrafi və geosiyasi vəziyyəti ölkəmiz üçün əlavə imkanlar yaradır. Azərbaycan çox etibarlı tərəfdaş kimi çıxış edir. Sənaye zonaları, Ələt Azad İqtisadi Zonası fəaliyyət göstərir. “Abşeron”, “Şahdəniz” qaz-kondensat yatağından çıxarılan qazın dünya əhəmiyyəti var. Bütün bunlar Prezident İlham Əliyevin düşünülmüş daxili və xarici siyasətinin təzahürüdür”, - deyə Alı Balayev fikrini yekunlaşdırıb.