Təhsil və şəhərsalma: yeni çağırışlar
Bakı, 15 may, AZƏRTAC
Təhsil infrastrukturumuz müasirləşdirilib, məzmunumuzun keyfiyyəti, beynəlxalq rəqabətlilik artırılıb. Təhsilə diqqət və qayğı təbii ki, yüksək səviyyədədir. Bu gün görünən budur ki, əgər biz ölkənin davamlı inkişafını, dayanıqlı inkişafını təmin etmək istəyiriksə, ilk növbədə, insan kapitalına diqqət yetirməliyik.
AZƏRTAC xəbər verir ki, bu fikirləri elm və təhsil nazirinin müavini İdris İsayev Bakı Dövlət Universiteti (BDU) və Dövlət Şəhərsalma və Arxitektura Komitəsinin birgə təşkilatçılığı ilə keçirilən “Bakı Şəhərsalma Həftəsi” çərçivəsində təşkil olunan “Dayanıqlı və davamlı şəhər inkişafı üçün insan kapitalının formalaşdırılması” mövzusunda beynəlxalq konfransda deyib.
O bildirib ki, şəhərlərin də dayanıqlı və davamlı inkişafı, ilk növbədə, həmin şəhərlərdə yaşayan insanların keyfiyyət göstəricilərindən asılıdır: “Bu gün şəhərlərin davamlı-dayanıqlı inkişafı üçün məhz bilikli, bacarıqlı, yenilikləri və təşəbbüsləri qiymətləndirib tətbiq edə bilən, kreativ yanaşması olan, yaradıcı yanaşması olan, innovativ yanaşması olan bir sıra müasir bacarıqlara, xüsusilə də rəqəmsal bacarıqlara, yaşıl bacarıqlara, sosial bacarıqlara malik olan, nəzəri və praktiki bilikləri mənimsəyə bilən insan kapitalına ciddi ehtiyacımız vardır.
Bu ehtiyacı bizim təhsil müəssisələri qarşılamalıdırlar. Təhsil sistemimiz bu proseslərin də önündə dayanmalıdır. Bu istiqamətdə yeni ixtisaslar, yeni proqramlar təsdiq edilir, tələbə qəbulu planları artırılır. Məqsəd ondan ibarətdir ki, şəhərlərimizin dayanıqlı və davamlı inkişafı üçün lazım olan, tələb olunan ixtisaslara, kvalifikasiyalara uyğun kadr hazırlığı təmin edilsin”.
Nazir müavini dünyada da “ağıllı şəhər”, “ağıllı kənd”, “inklüziv şəhər” kimi modellər tətbiqini vurğulayıb: “Təqdirəlayiq haldır ki, işğaldan azad olunmuş ərazilərdə də bu tədbiqlərdən istifadə olunur. Hansı tədbiqlərin tətbiq olunmasından asılı olmayaraq, bütün bu proseslərin arxasında insan durur, insan kapitalı durur. Bütün bu texnoloji həllər, yaşıl həlləri formalaşdıran insanlardır. Ümid edirəm ki, bundan sonra da şəhərlərimizin inkişafında bizim təhsil müəssisələri tərəfindən yetişdiriləcək kadrlar öz töhfələrini verə biləcəklər”.
Bölmənin digər xəbərləri
