“Tesla”nın 6 min əməkdaşı kompaniyanı irqçilikdə ittiham edir
Bakı, 1 mart, AZƏRTAC
“Tesla”nın Kaliforniyadakı fabrikinin 6 minə yaxın qaradərili əməkdaşı onları irqçilikdən qoruya bilmədikləri üçün kompaniyaya qarşı iddia qaldıracaq.
AZƏRTAC xəbər verir ki, iddiaçıların şikayətinə görə, ABŞ kompaniyası “Tesla” müəssisələrində geniş yayılan irqi ayrı-seçkilik və təqiblərə qarşı tədbir görmür. Tərəflər mövqelərini cümə gününə təyin edilən dinləmədə təqdim edəcəklər.
Analoji iddia ilk dəfə 2017-ci ildə “Tesla”nın əməkdaşı Markus Von tərəfindən qaldırılıb. Şikayətdə kompaniya əməkdaşlarının müntəzəm olaraq irqi söyüşlərdən istifadə etdiyi deyilir. Kompaniyanın digər sabiq işçisi, Afrika əsilli amerikalı Ouen Diaz 2022-ci ildə “Tesla”dan təzminat almağa müvəffəq olub.
Kompaniyanın rəhbərliyi isə öz növbəsində iş yerlərində irqi təqiblərə qarşı mübarizə apardıqlarını və qanun pozuntusuna yol verən əməkdaşların işdən çıxarıldığını bildirib.
Bölmənin digər xəbərləri
