Tibbi sosial media məlumatları əsasında klinikaların fəaliyyətinin idarə olunması tədqiq edilir
Bakı, 5 iyul, AZƏRTAC
İnformasiya Texnologiyaları İnstitutunda klinikaların fəaliyyətinin idarə olunması ilə bağlı tədqiqatlar aparılır.
Bu barədə AZƏRTAC-a institutdan məlumat verilib. Bildirilib ki, tədqiqat işində tibbi sosial media resurslarında toplanan informasiya əsasında klinikaların fəaliyyətinin idarə olunması üçün innovativ yanaşma təklif edilib. İnnovativ yanaşma klinikaların idarə olunması qərarlarının dəstəklənməsi üçün kraudsorsinq tədqiqata, yəni problemin həllinə geniş insan kütləsinin cəlb edilməsinə, onların tibbi sosial media resurslarındakı rəy, bilik və tövsiyələrinə istinad edir.
Hazırda tibbi media resurslarında toplanan rəylər əsasında klinikaların fəaliyyətinin qiymətləndirilməsi üçün yeni meyarlar sisteminin təyini və rəylərin təsnifləndirilməsi məsələsinə baxılır. Bu məqsədlə “Kaggle” şirkətinin bazasında toplanan rəylərin leksikon əsaslı sentiment analizi aparılır. Tədqiqatdan alınan nəticələr klinikaların fəaliyyətinin təkmilləşdirilməsi, mövcud problemlərin aradan qaldırılması, tibbi xidmətin keyfiyyətinin yaxşılaşdırılması qərarlarının qəbulunda istifadə oluna bilər.
Bölmənin digər xəbərləri
