TOEFL iBT imtahanında yeniliklər tətbiq olunacaq
Bakı, 5 iyul, AZƏRTAC
İyulun 26-dan etibarən Təhsildə Qiymətləndirmə Xidməti (Educational Testing Service) tərəfindən TOEFL iBT imtahanında yeniliklər tətbiq olunacaq.
Dövlət İmtahan Mərkəzindən AZƏRTAC-a bildirilib ki, yeni qaydalara əsasən, imtahan müddəti 2 saatdan az olacaq. Ümumi imtahan modelində isə dəyişiklik edilməyib.
İmtahan vaxtının qısaldılması nəticəsində:
-Test prosesi zamanı kompüterdə namizədlər üçün sadələşdirilmiş təlimat əks olunacaq;
-Əvvəlki “Müstəqil yazı tapşırığı”nı “Akademik müzakirə üçün yazı” tapşırığı əvəz edəcək. Bu tapşırığı yerinə yetirəndən onlayn sinif müzakirəsində verilən mövzuya dair rəy bildirmək və bu fikrini əsaslandırmaq tələb olunacaq;
-Dinləmə blokundan sonra tətbiq edilən 10 dəqiqəlik fasilə ləğv ediləcək;
-Oxu bloku üzrə mətnlərin və tapşırıqların sayı azaldılacaq;
-Daha öncə test blokuna daxil edilən, lakin qiymətləndirilməsi aparılmayan test tapşırıqları test blokundan çıxarılacaq.
Testin hər bölməsi üzrə qiymətləndirmə şkalası 0-30 bal aralığında olmaqla eyni qalır.
İmtahana qeydiyyat prosesi həmişəkindən daha sürətli və sadə olmaqla aşağıdakıları əhatə edəcək:
-İntuitiv naviqasiya;
-Təkmilləşdirilmiş istifadə imkanları;
-Mobil cavab verən dizayn;
-Əlavə yerli ödəniş variantları.
DİM-də keçiriləcək kompüter əsaslı TOEFL iBT imtahanlarının ikinci yarımil üzrə olan tarixləri Mərkəzin saytında yerləşdirib.
Yeniliklərdən biri də imtahan bitdikdən sonra iştirakçıların rəsmi nəticələrinin nə zaman elan edilməsi ilə bağlı bildiriş alması olacaq.
Xatırladaq ki, qeyd edilən dəyişikliklər sadəcə kompüter əsaslı TOEFL iBT imtahanına aiddir, kağız daşıyıcılar vasitəsilə keçirilən imtahana şamil edilmir.
Dəyişikliklərlə tanış olmaq məqsədilə TOEFL iBT ödənişsiz sınaq testi və TOEFL iBT sınaq setlərinin yenilənmiş versiyaları artıq ETS-in saytında mövcuddur. Eyni zamanda, iyulun 26-dan etibarən ödənişsiz TOEFL Go!® tətbiqi ilə istənilən yerdə TOEFL iBT imtahanına hazırlaşmaq olar. Tətbiq həm mobil, həm də masaüstü cihazlar üçün işlək olacaq.
Bölmənin digər xəbərləri
