Tomsk gəncləri Rusiyanın cənub qonşusu Azərbaycanla tanış ola biləcəkdir
Bakı, 1 fevral (AZƏRTAC). “Tomsk gəncləri Rusiyanın cənub qonşusu Azərbaycan ilə tanış ola biləcəkdir. Tomsk çoxmillətli şəhərdir. Lakin bizimlə yanaşı yaşayan xalqların mədəniyyəti barədə az bilirik. Təəssüf ki, əksəriyyətimizin bu sahədə bilikləri kabab, plov və düşbərə ilə məhdudlaşır. İndi “Azərbaycan Rusiya şagirdlərinin və tələbələrinin gözü ilə” Ümumrusiya intellektual bilik yarışması iştirakçıları üçün postsovet məkanının ən gözəl respublikalarından birinin mədəniyyəti ilə tanış olmaq imkanı vardır”. Bu sözlər “Moskovski komsomolets v Tomske” qəzetində dərc olunmuş “Mersi, Baku” məqaləsindəndir.
AZƏRTAC qəzetin saytına istinadla xəbər verir ki, tədbirin təşkilatçılarından biri Tomsk şəhərinin Gənclər Şurasıdır.
Şuranın sədri Olesya Kudryavtseva bildirmişdir ki, müsabiqədə Rusiya vətəndaşı olan bütün şagird və tələbələr iştirak edə bilərdilər. Noyabr ayı ərzində esse yazıb müsabiqəyə göndərmək tələb olunurdu. Tomsk vilayəti üzrə qiyabi mərhələnin 8 qalibi başlıca mükafat - Azərbaycana pulsuz səfər etmək və Azərbaycan mədəniyyəti ilə yaxından tanış olmaq uğrunda mübarizəyə qoşuldular.
Olesya Kudryavtseva deyir: “Tomsk vilayəti çoxmillətli regiondur. Biz birlikdə mehriban yaşayırıq. Lakin biz bir-birimiz barədə az bilirik. Odur ki, müsabiqəyə çox gənc iştirakçılar maraq göstərmişlər”.
Gənclər Şurasının üzvləri şübhə etmirlər ki, çoxmillətli multimədəni cəmiyyət Rusiyanın və dünyanın uğurlu inkişafının təminatıdır. Milli zəmində möhtəkirlik yaxşı nəticələr vermir. Yalnız dialoq yolu ilə, bir-birimizin mədəniyyətini öyrənmək yolu ilə yeni gələcək qurmaq mümkündür. Bu, gənc nəslin vəzifəsidir, çünki SSRİ dövründə yaşamış nəsil beynəlmiləl ruhda tərbiyə almışdır.
Tomsk şəhər Dumasının deputatı Şaban Bayramov müsabiqə iştirakçılarına müraciət edərək demişdir: “Biz hamımız Sovet İttifaqının övladlarıyıq. Mən istərdim ki, bizim övladlarımız da yaşlı nəsil kimi bir-birinə hörmət etsin və dözümlülük şəraitində yaşasınlar. Bu tədbir qalibi müəyyən etməklə yanaşı, bir-birimizə hörmət və ehtiramımızı bildirməyə imkan verir”.
“Azəri” Milli-Mədəni Mərkəzinin sədri, Tomsk Dumasının deputatı Ələkbər Rəhimov vurğulamışdır ki, “Azərbaycan Rusiya şagird və tələbələrinin gözü ilə” müsabiqəsi Tomsk və Azərbaycan gəncləri arasında dostluğun möhkəmləndirilməsinə kömək edəcəkdir. İndiki dövrdə bu, çox vacibdir. Azərbaycan keçmiş SSRİ-nin ən gözəl respublikalarından biridir. Xalqlarımız müharibə dövründə də, əmin-amanlıq illərində də bir yerdə olmuşlar. Bu dostluğun gənc nəslə aşılanması çox vacibdir. Mən məzuniyyətə gedəndə rusiyalı dostlarımı da özümlə aparmağa və Vətənimi onlara göstərməyə çalışıram. Müsabiqə iştirakçılarının Azərbaycanı yayda görmək, bu ölkənin füsünkarlığını kəşf etmək imkanı olacaqdır”.
Əyani mərhələnin 8 iştirakçısı təkcə rus dilində deyil, həm də Azərbaycan dilində dialoq qurmağa çalışmışdır. Çıxışlar zamanı əvvəllər heç vaxt Qafqazda belə olmamış və bu diyar barədə yalnız filmlər, kitablar, fotoşəkillərdən məlumat almış iştirakçılar Azərbaycanı vəsf edirdilər.
Tomsk Azərbaycan Gənclər Təşkilatının sədri Lamiyə Bayramova qonaqlara demişdir: “Bugünkü tədbir gənclərin yaşlıların dəstəyi sayəsində necə işlədiklərini göstərdi. Mən səmimi qəlbdən inanıram ki, Rusiya-Azərbaycan dostluğu əbədidir. Biz gənclər bu dostluğun gün-gündən möhkəmlənməsi üçün əlimizdən gələni edəcəyik”.
Yeri gəlmişkən, müsabiqənin əyani mərhələsinin münsiflər heyətinin üzvləri arasında Bakıdan və Moskvadan xüsusi olaraq gəlmiş qonaqlar da var idi. Ümumdünya Azərbaycanlılar Konqresinin Rusiya nümayəndəliyinin təmsilçisi Tahir Hacıyev, Rusiya Azərbaycanlıları Muxtariyyətinin vitse-prezidenti Qalib Ağayev və müğənni Şəmistan Əlizamanlı.
Qalibləri də məhz onlar müəyyən etmişlər. Birinci yeri Anna Şatskaya, ikinci yeri Natalya Kuleshova, üçüncü yeri Aleksandra Kovalyova tutmuşlar. Lakin münsiflər heyətinin və fəxri qonaqların qərarı hamını təəccübləndirmişdir. Əyani turun bütün iştirakçıları Azərbaycana səfər edəcəklər: qaliblər təşkilatçıların, qalanları isə diasporun hesabına. Onlar bir həftə ərzində Azərbaycanın görməli yerlərini gəzəcəklər.
Bölmənin digər xəbərləri
