Tovuz döyüşləri İkinci Qarabağ müharibəsinə aparan yol idi – Hərbi ekspert
Bakı, 11 iyul, AZƏRTAC
Tovuz döyüşləri Azərbaycanın hərb tarixinə növbəti dəfə qızıl hərflərlə yazılmış əməliyyat idi. 2016-cı il aprel hadisələri, 2018-ci ilin Naxçıvan istiqamətində Günnüt əməliyyatı və növbəti olaraq Tovuz döyüşləri artıq bu istiqamətdə Azərbaycan Ordusunun gücünü və qüdrətini bir daha sübut etdi. Nəzərə almalıyıq ki, hər zaman olduğu kimi, Ermənistan 30 il ərzində danışıqlar prosesini imitasiya etməklə həmin bu ərəfədə növbəti olaraq öz işğalçı məqsədini, riyakarlığını ortaya qoydu. Əlbəttə ki, Azərbaycan Ordusu 1990-cı illərin ordusu deyildi, düşmənə bu döyüşlərdə çox ciddi şəkildə zərbə endirildi.
Bu fikirləri AZƏRTAC-a açıqlamasında hərbi ekspert Azər Bayramov söyləyib.
O qeyd edib ki, Ermənistan tərəfi hər zaman olduğu kimi, Tovuz döyüşləri zamanı da öz riyakar mövqeyini nümayiş etdirirdi. Hətta öz ictimaiyyətindən belə gizlətməyə çalışdığı itkilərini sonradan məcburi şəkildə etiraf etməyə başladı. İlkin olaraq iki polisin və hərbçinin məhv edildiyini bildirsə də, sonradan 100-ə yaxın canlı qüvvəsinin, 10-larla texnikasının, hərbi obyektlərinin və qərargahlarının Azərbaycan Ordusu tərəfindən məhv edildiyi məlum oldu. Ermənistanın Tovuz istiqamətində hücuma keçməyi təsadüfi sayıla bilməz.
Onun fikrincə, eyni zamanda, Azərbaycanın strateji kommunikasiyalarının həmin istiqamətdən keçdiyini nəzərə alsaq, Ermənistanın məkrli niyyəti açıq-aydın bəlli olar. Bu niyyətlərin qarşısını Ordumuz qətiyyətlə aldı. Tovuz döyüşlərini İkinci Qarabağ müharibəsinə aparan yol kimi də qiymətləndirməliyik. Bu döyüşlərdə ali rütbəli zabitlərimizin, general-mayor Polad Həşimovun əsgərlərlə birlikdə ön xətdə, səngərdə çiyin-çiyinə vuruşması da ondan xəbər verirdi ki, artıq Silahlı Qüvvələrimiz əvvəlki ordu deyil. Burada nəinki ordu, eyni zamanda, xalq və Ali Baş Komandan İlham Əliyevin birlikdə bir yumruq şəklində vəhdət təşkil edərək düşmənə qarşı apardığı mübarizə Vətən müharibəsində Qələbənin əsas amillərindən biridir. Nəticə etibarilə də Azərbaycan xalqının artıq bu hadisədən sonra səbri qalmadı. Xalqımız düşməni yerində otuzdurmaq üçün ciddi addımlar atılması məqsədilə böyük yürüş təşkil etdi.
A.Bayramov deyib ki, ordumuz 2020-ci ilin sentyabrında əks-hücum əməliyyatı keçirərək işğal olunmuş ərazilərimizi düşməndən təmizlədi və onun 30 il ərzində yenilməz olduğu haqqında yaranmış mifi darmadağın etdi. Azərbaycan xalqı adını Qalib xalq kimi hərb tarixinə artıq yazdırmağı bacardı. İkinci Qarabağ savaşından üç il ötməsinə baxmayaraq, Ermənistan yenə də öz üzərinə götürdüyü öhdəlikləri nəinki yerinə yetirmir, tam əksinə olaraq silahlanmaya və eyni zamanda təxribatlarını intensivləşdirməyə davam edir. Ermənilər ötən təxribatlar zamanı ona verilən dərslərdən nəticə çıxarmayaraq, öz havadarlarına güvənərək riyakar məqsədlərini davam etdirməyə çalışır.
“Gələcəkdə törədiləcək belə təxribatların qarşısının alınmasında Azərbaycan Ordusunun növbəti əməliyyatları məcburi və zəruri olacaq. Tam əminliklə deyə bilərəm ki, bunu Ermənistan üçün növbəti dəfə faciə olaraq görəcəyik və bütün baş verən proseslərdən təcavüzkar ölkənin siyasi-hərbi rəhbərliyi cavabdehlik daşıyacaq. Baxmayaraq ki, Azərbaycan hər zaman olduğu kimi, yenə də proseslərə humanist mövqedən yanaşmağa çalışır. Lakin Ermənistanın rəhbərliyi və eyni zamanda Qarabağdakı separatçılar və o qondarma rejimin rəhbərliyi bu humanist yanaşmadan sui-istifadə edərək öz təxribatlarını davam etdirməyə çalışırlar.
Bir daha vurğulayım ki, bu təxribatların nəticəsində baş verəcəklərdən yalnız separatçı qondarma rejimin və Ermənistanın hərbi-siyasi rəhbərliyi məsuliyyət daşıyacaq”, - deyə hərbi ekspert vurğulayıb.
Bölmənin digər xəbərləri
