Prezident İlham Əliyevin YAP-ın qurultayındakı nitqindən irəli gələn məsələlər Tovuzda müzakirə olunub
Tovuz, 14 oktyabr, AZƏRTAC
Tovuzda Prezident İlham Əliyevin Yeni Azərbaycan Partiyasının (YAP) VIII Qurultayındakı nitqindən irəli gələn məsələlərə həsr olunan müşavirə keçirilib.
AZƏRTAC-ın bölgə müxbirinin məlumatına görə tədbirdə rayonun aidiyyəti qurumlarının rəhbərləri, ağsaqqallar və ictimaiyyət nümayəndələri iştirak ediblər.
Müşavirədə Prezident İlham Əliyevin nitqində müəyyənləşdirilən inkişaf prioritetləri, milli təhlükəsizliyin və müstəqilliyin qorunması, iqtisadi tərəqqinin davam etdirilməsi, gənclərin vətənpərvərlik ruhunda tərbiyəsi və milli-mənəvi dəyərlərin mühafizəsi məsələləri müzakirə olunub.
Tovuz Rayon İcra Hakimiyyətinin başçısı Məmməd Məmmədov qarşıya qoyulan vəzifələrin icrasının vacibliyini vurğulayıb. O, rayonda sosial-iqtisadi inkişaf, əhalinin qaz, elektrik enerjisi və içməli su təminatının yaxşılaşdırılması, yol infrastrukturunun yenilənməsi istiqamətində görülən işlərdən danışıb.
Kənd təsərrüfatının inkişafından danışılıb, kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramından irəli gələn vəzifələr diqqətə çatdırılıb.
Müşavirədə təhsil və maarifləndirmənin gücləndirilməsi, kommunal xidmətlərin keyfiyyətinin artırılması, ailələrlə işin təşkili, gənclərin dövlətçilik və vətənpərvərlik ruhunda yetişdirilməsi, milli-mənəvi dəyərlərin qorunması ilə bağlı məsələlərə də toxunulub. Qarşıda duran vəzifələrin əlaqələndirilmiş şəkildə icrasının və fəaliyyətin səmərəliliyinin artırılmasının əhəmiyyəti vurğulanıb.
Müxbir - Ruslan Novruzoğlu
Bölmənin digər xəbərləri
