Gənc tibb işçilərinin peşəkar inkişafının dəstəklənməsi ilə bağlı tədbirlər davam etdirilir
Quba, 14 oktyabr, AZƏRTAC
Azərbaycan Həmkarlar İttifaqları Konfederasiyasının üzv təşkilatı Azərbaycan Səhiyyə İşçiləri Həmkarlar İttifaqı Respublika Komitəsinin təşkilatçılığı ilə Qubada “Gənc Tibb İşçilərinin Konfransı”nın növbəti mərhələsi keçirilib.
AZƏRTAC-ın bölgə müxbiri xəbər verir ki, konfransda aidiyyəti dövlət qurumlarının, səhiyyə strukturlarının və həmkarlar ittifaqı təşkilatlarının nümayəndələri ilə yanaşı, Quba, Qusar, Xaçmaz, Şabran, Siyəzən və Xızı rayonlarından 150 nəfərə yaxın gənc tibb işçiləri iştirak edib.
Konfransın əsas məqsədi gənc tibb işçilərinin peşəkar inkişafının dəstəklənməsi, əmək hüquqları, psixoloji rifahı və karyera imkanları ilə bağlı məsələlərin müzakirəsi, həmçinin gənc mütəxəssislərin regionlarda davamlı fəaliyyətinin təşviq edilməsidir.
Konfrans Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad edilməsi ilə başlayıb.
Açılış mərasimində Quba Rayon İcra Hakimiyyətinin başçısının müavini Səidə Abasova, Milli Məclisin deputatı Əlibala Məhərrəmzadə, Səhiyyə İşçiləri Həmkarlar İttifaqı Respublika Komitəsinin sədri Elnara Muradova, eləcə də digər dövlət və ictimai qurumların nümayəndələri çıxış ediblər. Çıxışlarda gənclərin ölkənin sosial-iqtisadi inkişafındakı rolu, səhiyyə sektorunda gənc kadrların potensialı, onların peşəkar inkişafının dəstəklənməsi və regionlarda fəaliyyət göstərən gənc tibb işçiləri üçün əlverişli imkanların yaradılmasının əhəmiyyəti vurğulanıb.
Bildirilib ki, tədbir regional əməkdaşlığın genişləndirilməsi, gənc səhiyyə işçiləri arasında təcrübə mübadiləsinin aparılması və peşəkar əlaqələrin inkişaf etdirilməsi baxımından mühüm platformadır.
Açılış mərasimindən sonra konfrans panel müzakirələrlə davam etdirilib.
“Səhiyyə gəncləri üçün peşəkar çağırışlar” mövzusundakı I paneldə karyera planlaması, davamlı peşəkar inkişaf, uğurlu peşə modeli, səhiyyə işçilərinin psixoloji rifahının qorunması, eləcə də gənclərin peşəkar inkişafının və sosial rifahının təmin olunmasında həmkarlar ittifaqlarının rolu müzakirə edilib.
“Gənclərin regionlarda inkişaf yolu” adlı II paneldə isə tibb müəssisələrində çalışan gənc kadrların qarşılaşdıqları əsas problemlər, peşə fəaliyyəti zamanı yarana biləcək hüquqi risklər, xəstə hüquqlarının qorunması, həmçinin gənclərin bölgələrdə davamlı məşğulluğunun təşviqi üçün motivasiya mexanizmləri diqqət mərkəzində olub.
Konfransın interaktiv hissəsində gənc tibb işçiləri arasında intellektual yarış təşkil edilib. Yarış zamanı iştirakçılar tibbi biliklərini, analitik düşünmə, klinik qərarvermə, etik yanaşma və komanda işi bacarıqlarını nümayiş etdiriblər.
Bu konfrans Azərbaycan Səhiyyə İşçiləri Həmkarlar İttifaqı Respublika Komitəsinin gənc tibb işçilərinin peşəkar inkişafının, sosial rifahının və regionlarda fəaliyyətinin davamlılığının dəstəklənməsinə yönəlmiş silsilə regional layihələrinin növbəti mərhələsidir. Bundan əvvəl Şamaxı, Qəbələ, Tovuz və Yardımlı rayonlarında da konfranslar keçirilib.
Müxbir – Elxan Yusifli
Bölmənin digər xəbərləri
