SİYASƏT
“Türkdilli ölkələrin diaspor təşkilatları arasında ortaq fəaliyyət strategiyası” imzalanmışdır
Bakı, 15 may (AZƏRTAC). Mayın 14-də Ankarada Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin ikinci toplantısı keçirilmişdir.
Diasporla İş üzrə Dövlət Komitəsindən AZƏRTAC-a bildirmişlər ki, Türkiyə Baş nazirinin müavini Bəkir Bozdağın sədrliyi ilə keçən toplantıda Azərbaycan, Qazaxıstan, Qırğızıstan və Türkiyənin diaspor təşkilatlarının rəhbərləri iştirak etmişlər. Toplantıda Azərbaycanı Diasporla İş üzrə Dövlət Komitəsi sədrinin birinci müavini Valeh Hacıyev təmsil etmişdir.
“Türkdilli ölkələrin diaspor təşkilatlarının ortaq fəaliyyət strategiyası”nın əhəmiyyəti vurğulanan tədbirdə çıxış edən Xaricdə Yaşayan Türklər və Əqrəba İcmalar Departamentinin rəhbəri Kamal Yurtnaç bildirmişdir ki, bu toplantı onların indiyədək keçirdikləri iclasların ən önəmlisidir.
Diasporla İş üzrə Dövlət Komitəsi sədrinin birinci müavini Valeh Hacıyev türk dünyasının problemlərini həll etmək üçün türk xalqlarının vahid diaspor altında birləşməsinin vacibliyini vurğulamışdır. V.Hacıyev demişdir ki, soydaş xalqların ortaq fəaliyyəti onların güclü addımlarla irəliləməsini təmin edəcəkdir. Türkdilli Ölkələrin Əməkdaşlıq Şurasına üzv dövlətlərin diaspor təşkilatları rəhbərlərinin Birinci Forumunun bu ilin iyununda Bakıda keçirilməsi qərarı da Azərbaycanın həmin məsələyə verdiyi önəmin bariz nümunəsidir.
Bəkir Bozdağ iclasın əhəmiyyətini vurğulayaraq bildirmişdir ki, diasporların xaricdə birgə fəaliyyəti bir çox məsələlərin həllində önəmli rol oynayacaqdır. O demişdir ki, bu cür tədbirlərin təşkili xaricdə birlikdə hərəkət etmək iradəsini ortaya qoya bilmək üçün müsbət addımdır. Türk respublikalarının öz aralarındakı əlaqələri fərqli məcraya yönəltməli olduqlarını söyləyən B.Bozdağ diqqətə çatdırmışdır ki, qarşıya qoyulan məqsədlərə çatmaq üçün Xaricdə Yaşayan Türklər və Əqrəba İcmalar Departamenti də ciddi səylər göstərir.
Sonra Türkdilli Ölkələrin Əməkdaşlıq Şurasına üzv ölkələr - Türkiyə, Azərbaycan, Qazaxıstan və Qırğızıstan arasında “Türkdilli ölkələrin diaspor təşkilatlarının ortaq fəaliyyət strategiyası” imzalanmışdır.
Toplantıda Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin iyunun 21-də Bakıda keçiriləcək Birinci Forumunun proqramına dair müzakirələr də aparılmışdır. Həmin Forumda ümumi iclasdan əlavə üç istiqamətdə - Amerika, Kanada; Avropa, Asiya; MDB üzrə panel müzakirələrin də təşkili qərara alınmışdır.
Xatırladaq ki, Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin ilk iclası bu il yanvarın 24-25-də Bakıda keçirilmişdir.