SİYASƏT
Türkiyə-Azərbaycan qardaşlığının daha da möhkəmlənməsində hər iki dövlətin liderinin böyük rolu var
![Türkiyə-Azərbaycan qardaşlığının daha da möhkəmlənməsində hər iki dövlətin liderinin böyük rolu var](/files/2023/1/1200x630/1681203389206474992_1200x630.jpg)
Bakı, 11 aprel, AZƏRTAC
2022-ci ildə Türkiyə texnologiya sahəsində yeni dövrə qədəm qoydu. Bu, “Togg” markalı mobil avtomobilin istehsal ediləcəyi zavodun açılışı ilə gerçəkləşdi. Bursada açılan zavodun Türkiyə sənayesinin inkişafı üçün böyük rol oynayacağı gözlənilir. Həmin avtomobilin ilk nümunələri Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyevə təqdim olundu. Bu, iki dövlət arasındakı qardaşlıq münasibətinin daha bir göstəricisidir. Böyük ehtimal ki, gələcəkdə təqdim olunacaq digər avtomobillərin də sahibləri digər türk dövlətlərinin başçıları olacaq. Ümumiyyətlə son illər Türkiyədə müdafiə sənayesində, eləcə də mülki sənayedə yüksək texnoloji nailiyyətlər əldə edilib. Yüksək səviyyədə istehsal olunan həmin texnologiyaların bariz nümunəsini 44 günlük Vətən müharibəsində gördük. Vətən müharibəsində Türkiyənin “Baykar” şirkətinin istehsal etdiyi pilotsuz uçuş aparatlarının və digər məhsullarının xidmətlərindən yararlandıq və nəticəsi də məlumdur. İkinci Qarabağ müharibəsində bütün dünya Azərbaycan Ordusunun şanlı Qələbəsi ilə yanaşı, Türkiyənin yüksək səviyyədə istehsal olunan hərbi sənaye məhsullarına şahidlik etdi. Möhtəşəm Zəfər, həmçinin bütün dünya qarşısında türk birliyinin sarsılmaz olduğunu sübuta yetirdi.
Bunu AZƏRTAC-a açıqlamasında politoloq Ramiyə Məmmədova deyib.
Politoloq bildirib ki, son illərdə qardaş ölkənin elmi nailiyyətləri, həm sənaye, həm texnologiya, həm də xarici siyasət sahəsində uğurları bir çox ölkələri narahat edir və təşvişə salır.
“Təşviş fonunda təzyiqlər də artır. Bir neçə müddətdir ki, Qərbin Türkiyəyə qarşı basqıları səngimək bilmir. Bu məqamda, qardaş ölkədə törədilən son terror aktlarını xatırlamaq yetərlidir. İnsanların ölümünə səbəb olan bu cür əməllər Türkiyə daxilində iğtişaşlar yaratmağa, hakimiyyətin illər ərzində ölkəni irəli aparan addımlarını gözdən salmağa, insanların gözündə Türkiyə hakimiyyətini cılızlaşdırmağa hesablanıb. Görünən odur ki, Qərb buna nail ola bilmir. Çünki Türkiyə əvvəlki dövlət deyil və onu inkişafdan saxlamaq o qədər də asan görünməməlidir. Türkiyənin gücü həm xarici siyasətdə, həm daxili siyasətdə, həm də texnologiyalarda həddən artıq yüksək səviyyədədir. Qarşıdan Türkiyədə prezident və parlament seçkiləri gəlir. Hazırda qardaş ölkədə seçki öncəsi gərgin mübarizəyə şahidlik edirik. Müxalifət birləşərək Türkiyə hakimiyyətinə qarşı bir nəfərin namizədliyini irəli sürüb. Hazırkı Prezident Rəcəb Tayyib Ərdoğanın seçkidə qalib gələrək gələcək beş il üçün öz vəzifəsində qalmasını bir azərbaycanlı olaraq vacib sayırıq. Bu, Azərbaycanın da xeyrinədir. Seçkiləri yaxından izləyir və proseslərə dəstək verməyə çalışırıq. Azərbaycanla Türkiyə arasında olan isti münasibət tək Türkiyə və Azərbaycan dövlətlərindən, xalqlarından asılı deyil. Dostluq və qardaşlıq əlaqələrinin yüksələn xətlə inkişafı iki liderin - Prezident Rəcəb Tayyib Ərdoğan və Prezident İlham Əliyevin yüksək səviyyədə olan münasibətlərindən qaynaqlanır. Türkiyə-Azərbaycan qardaşlığının daha da möhkəmlənməsi və türk dünyasının birləşməsində bu iki liderin böyük rolu var. Xalqın gözü tərəzidir. Əminəm ki, Türkiyə xalqı düzgün seçim edəcək, səslərini layiqli namizədə verəcək, Türkiyənin bu cür səviyyəyə gəlib çatmasına vəsilə olan rəhbərin növbəti beş il üçün də prezidentlik fəaliyyətinə davam etməsinə nail olacaq”, - deyə Ramiyə Məmmədova qeyd edib.