SİYASƏT
Türkiyə bütün beynəlxalq platformalarda nüfuzlu və təsirli bir mövqeyə yüksəlib
Bakı, 13 aprel, AZƏRTAC
Türkiyə prezident seçkilərinə gedir. Bu seçki dünyanın diqqət mərkəzində olduğu kimi Azərbaycan siyasi arenasında da ciddi izlənilən prosesdir. Aparılan sorğular onu deməyə əsas verir ki, seçkilərin favoriti Rəcəb Tayyib Ərdoğandır. Onun hakimiyyəti illərində qardaş Türkiyə bir sıra uğurlara imza atıb. Sosial problemlər həll olunub. Siyasi sabitlik təmin edilib.
Bu sözləri AZƏRTAC-a açıqlamasında Milli Məclisin deputatı İltizam Yusifov deyib.
Onun sözlərinə görə, R.T.Ərdoğanın iqtidarı dövründən başlayaraq Türkiyə, iqtisadi və digər sahələrdə inqilabi xarakterli addımlar atmağa başladı: “Təhsildən tutmuş iqtisadi təşəbbüslərə qədər hər sahədə bərabər imkanları təmin edən işlər görüldü. Vətəndaşların, inkişaf etmiş ölkələrdə olan bütün imkanlar sahib ola biləcəyi, üstəlik bunun güclü bir sosial dövlət çətiri altında asanlıqla əldə ediləcəyi bir infrastruktur yaradıldı. Təhsil sahəsində 10,3 milyard Türk lirəsi olan illik büdcə 304 milyard Türk lirəsindən çox artırıldı. Nəzarətsiz miqrasiya ilə effektiv mübarizə məqsədilə 18 min nəfərlik 30 geri göndərmə mərkəzi quruldu. Suriyada yaradılmış təhlükəsiz zonalara təxminən 530 min nəfərin könüllü əsasda geri qayıtması təmin edildi. 1460 kilometr uzunluqda sürət qatarı şəbəkəsi tikildi. Hava yolları sahəsində 26 olan hava limanı sayı 57-yə, dənizçilik sahəsində liman sayı 37-dən 84-ə çatdırıldı. Qardaş ölkədə su anbarı sayı 276-dan 930-a, su elektrik stansiyası sayı 97-dən 730-a, içməli su təsisi sayı 84-dən 370-ə və sulama təsisi sayı 1764-dən 3325-ə yüksəldildi. Ümumi Daxili Məhsul 238 milyard ABŞ dollarından 1 trilyon ABŞ dollarına qədər artdı. Satın alma gücü nisbətinə görə Türkiyə dünyanın ən böyük 11-ci, Avropanın 4-cü iqtisadiyyatı səviyyəsinə yüksəldi”.
İ.Yusifov onu da bildirib ki, Türkiyənin dünyadakı yeri və əhəmiyyətinin yüksəlməsi R.T.Ərdoğan siyasətinin uğurlarının əsasını təşkil edir. Türkiyə xarici siyasətdə, diplomatik təmsilçilik sayı 163-dən 255-ə çıxarıldı. Türkiyə bütün beynəlxalq platformalarda nüfuzlu və təsirli bir mövqeyə yüksəlib. Bununla yanaşı Türkiyə son illərdə dünyanın ən mühüm cazibə mərkəzlərindən birinə çevrildi. Bir çox fərqli ixtisasa sahib peşəkarlar, təşəbbüskarlar Türkiyəyə gəlməyə başladılar. Dünyanın ən nüfuzlu simaları, yüksək potensiala malik insanlar Türkiyəni təhlükəsiz bir ölkə kimi görürlər. Onu da qeyd edək ki, Ərdoğan Türkiyənin müstəqil xarici siyasət həyata keçirməsini təmin etdi. Türkiyə, dünyada söz sahibi olan, öz siyasətini həyata keçirən bir ölkəyə çevrildi. Hər bir beynəlxalq problemdə Türkiyə Prezidentinin vasitəçiliyi və müdaxiləsi vacib haldır. İsrail-Fələstin, Rusiya-Ukrayna kimi münaqişələr başda olmaqla, Suriya, Liviya kimi mövzularda Türkiyə ən mühüm ölkə hesab olunur. Ukraynada davam edən müharibə nəticəsində dünyada baş verən ərzaq böhranının aradan qaldırılmasın üçün R.T.Ərdoğan tərəfindən başladılan müzakirə prosesi nəticəsində buğda razılaşması əldə edildi. İnkişaf etməmiş ölkələr başda olmaqla bir çox ölkənin qida çatışmazlığına məruz qalmasının qarşısı alındı.
Həmçinin diqqətə çatdırılıb ki, Azərbaycan-Türkiyə qardaşlığı Rəcəb Tayyib Ərdoğan dövründə daha da dərinləşdi. Azərbaycan Prezidenti İlham Əliyev ilə Türkiyə Prezidenti Ərdoğan sayəsində ölkələrimiz arasında münasibətlər tarixin ən yüksək səviyyəsinə yüksəldildi. Qarabağın düşmən işğalından azad edilməsi üçün aparılan Vətən müharibəsində “bir millət, iki dövlət” prinsipinə layiq bir mövqe nümayiş etdirildi, Azərbaycana böyük siyasi və mənəvi dəstək verildi, Azərbaycan torpaqları işğalçılardan təmizləndi.
Türkiyənin Türk dünyası ilə əlaqələri əvvəllər xəyal belə edilməyən səviyyəyə çatdığını bildirən İ.Yusifov bu işdə də Rəcəb Tayyib Ərdoğanın qətiyyətini xüsusi olaraq vurğulayıb: “Azərbaycan Prezidenti İlham Əliyev və Türkiyə Prezidenti R.T.Ərdoğanın səyləri nəticəsində Türk Dövlətləri Təşkilatı beynəlxalq təşkilatlar arasında nüfuzlu və mühüm bir rol oynamağa başladı. Türk birliyinin təmin olunması istiqamətində Ərdoğan dövründə atılan addımlar, bundan əvvəlki heç bir hakimiyyətin edə bilmədiyi qədər böyük olub. Türkiyə R.T.Ərdoğan dövründə terror problemini aradan qaldırdı. Separatist terror təşkilatı PKK başda olmaqla bir çox terror təşkilatına qarşı amansız mübarizə həyata keçirildi. Artıq terrorçular Türkiyədə fəaliyyət göstərə bilmir. Orta Şərqi terror zonasına çevirmək istəyən güclərə qarşı Türkiyə bütün imkanlardan istifadə edərək müqavimət göstərdi. İŞİD kimi terror təşkilatlarına qarşı həyata keçirilən əməliyyatlar ilə İslam dinin terrorla assosiasiya etmək istəyənlərin planları pozuldu.