Türkiyə Prezidenti ilə Almaniya Federal Kansleri bölgədəki son hadisələri müzakirə ediblər
İstanbul, 20 iyun, Günel Karatepe, AZƏRTAC
Türkiyə Prezidenti Rəcəb Tayyib Ərdoğan ilə Almaniya Federal Kansleri Fridrix Mers arasında telefon danışığı olub.
AZƏRTAC xəbər verir ki, bu barədə Türkiyə Prezidenti Administrasiyasının İctimaiyyətlə əlaqələr idarəsi məlumat yayıb.
Açıqlamaya əsasən, danışıq zamanı İsrail ilə İran arasındakı qarşıdurma, ikitərəfli münasibətlər və regional məsələlər müzakirə olunub.
Prezident Ərdoğan İranla nüvə mübahisələrinin həll yolunun danışıqlar masası olduğunu, İsrailin İrana hücumu ilə başlayan qarşıdurma prosesinin bölgənin təhlükəsizliyi üçün ən yüksək səviyyədə təhdid yaratdığını, alovlanan bu hadisələrin bölgəyə və Avropaya miqrasiya axını, eləcə də nüvə sızıntısı ehtimalı baxımından zərər verə biləcəyini qeyd edib.
Türkiyə Prezidenti ölkəsinin qarşıdurmanın sona çatdırılması və sabitliyin təmin olunması üçün səylər göstərdiyini, bu səylərin davam edəcəyini vurğulayıb.
Bölmənin digər xəbərləri
