Türkiyəli ekspert: Qlobal Bakı Forumu Azərbaycanın artan nüfuzunun və hörmətinin təzahürüdür
Ankara, 18 mart, AZƏRTAC
Qlobal Bakı Forumu kimi mötəbər dialoq platformaları Azərbaycanın beynəlxalq aləmdə mövqelərinin möhkəmlənməsinə mühüm töhfə verir.
AZƏRTAC xəbər verir ki, bu fikri Türkiyənin Uludağ Universitetinin İqtisadiyyat və idarəetmə fakültəsinin professoru Mehmet Yüce ifadə edib.
Ekspert Qlobal Bakı Forumunu siyasi əhəmiyyəti durmadan artıran “Qafqaz Davosu” adlandırıb. “Nizami Gəncəvi Beynəlxalq Mərkəzinin təşkilatçılığı ilə keçirilən Qlobal Bakı Forumu nisbətən qısa müddət ərzində bəşəriyyətin üzləşdiyi problem və çağırışların aradan qaldırılması yollarının müzakirəsi üzrə mühüm platforma kimi özünü təsdiqlədi”, - deyə Uludağ Universitetinin müəllimi bildirib.
O, XII Qlobal Bakı Forumunun işində dünyanın müxtəlif ölkələrindən yüzlərlə tanınmış siyasətçinin, o cümlədən keçmiş və indiki hökumət rəsmilərinin, parlamentarilərin iştirakına diqqət çəkib.
Professor vurğulayıb ki, belə yüksəksəviyyəli forumların təşkili Azərbaycanın artan nüfuzunun və ona olan hörmətin təzahürüdür. “İkinci Qarabağ müharibəsindəki Qələbə ilə Azərbaycan nəinki ərazi bütövlüyünü bərpa etdi, həm də qlobal siyasətin daha fəal oyunçusuna çevrildi, regional və qlobal problemlərin həllinə mümkün töhfə verməyə hazır oldu”, -deyə ekspert bildirib.
Şərhinə davam edən professor XII Qlobal Bakı Forumunun mövzusunun – “Dünya düzəninin yenidən düşünülməsi: Çağırışların fürsətə çevrilməsi” mövzusunun aktuallığını və Azərbaycan liderinin tədbirin açılışındakı məzmunlu nitqini diqqətə çatdırıb.
M.Yüce qeyd edib: “Azərbaycan Prezidenti İlham Əliyev dəfələrlə Qərbin ikili standartlar kursunu, həmçinin ayrı-ayrı ölkələrin müstəmləkəçilik siyasətini tənqid edib. Bunun bariz nümunəsi həm Azərbaycan torpaqlarının 30 ilə yaxındır Ermənistan tərəfindən işğalı zamanı, həm də İkinci Qarabağ müharibəsi zamanı dünya birliyinin nümayiş etdirdiyi mövqedir”.
Ekspertin fikrincə, müasir Azərbaycan mühüm aktordur, onun mövqeyi nəzərə alınmadan Cənubi Qafqaz regionunda hər hansı siyasi təşəbbüsün uğur qazanması mümkün deyil.
“Regional və qlobal güclər regiondakı yeni reallıqları nəzərə almalıdır. Eyni zamanda, Ankara ilə Bakı arasında sıx əməkdaşlıq qardaş ölkələrə dünya miqyasında öz maraqlarını daha uğurla müdafiə etməyə imkan verir”, - deyə M.Yüce sözlərinə yekun vurub.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
