Türkiyənin Eskişehir şəhərində yaşayan azərbaycanlılar vilayətin valisi ilə görüşmüşlər
İstanbul, 13 noyabr (AZƏRTAC). Türkiyənin Eskişehir şəhərində yaşayan azərbaycanlılar vali Güngör Azim Tuna ilə görüşmüşlər.
Eskişehir Azərbaycanlılar Dərnəyinin təşkil etdiyi görüşdə Anadolu və Osman Qazi universitetlərində işləyən azərbaycanlı müəllimlər və burada təhsil alan tələbələr iştirak etmişlər.
Dərnəyin rəhbəri Cavid Aydın 2013-cü ildə Türk Dünyası Mədəniyyət Paytaxtı olan Eskişehirdə bu çərçivədə keçirilmiş bütün tədbirlərdə Azərbaycandan gələn alimlər, yazıçılar, iqtisadçılar və incəsənət xadimlərinin fəal iştirak etdiklərini diqqətə çatdırmışdır. Yaxın günlərdə keçiriləcək Məhəmməd Təqi Zəhtabinin həyat və yaradıcılığına həsr olunmuş konfransda da azərbaycanlı alimlər məruzələr təqdim edəcəklər.
Vali G.A.Tuna bildirmişdir ki, Eskişehir türk dünyası mədəniyyət tədbirlərinə uğurla ev sahibliyi etmiş və Azərbaycan bu tədbirlərdə ən çox fərqlənən ölkələrdən biri olmuşdur.
Görüşdə Eskişehirin mərkəzindəki Odunpazarı rayonunda Azərbaycan Mədəniyyət Evinin yaradılması ilə bağlı layihə də müzakirə olunmuşdur.
Oqtay Bayramov
AZƏRTAC-ın xüsusi müxbiri
İstanbul
Bölmənin digər xəbərləri
