Türkiyənin hakim partiyası Makronun ikili standartlar siyasətini tənqid edib
Ankara, 1 aprel, AZƏRTAC
Türkiyənin hakim Ədalət və İnkişaf Partiyasının (AK Parti) sözçüsü Ömer Çelik Fransa prezidenti Emmanuel Makronu tənqid atəşinə tutub. O, Fransa liderinin İstanbulun keçmiş meri Ekrəm İmamoğluna qarşı korrupsiya ittihamlarına cavabını “ikili standartların təzahürü” adlandırıb.
AZƏRTAC xəbər verir ki, “A Haber” telekanalının efirində çıxış edən Çelik korrupsiya ilə bağlı aparılan istintaqın demokratik prinsiplərin qorunması mövzusu ilə heç bir əlaqəsi olmadığını bildirib.
AK Parti nümayəndəsi Makronun Fransa parlamentindəki ifrat sağçı Milli Birlik fraksiyasının lideri Marin Le Pen və digər 8 deputatı Avropa Parlamentinin vəsaitlərindən sui-istifadə etməkdə təqsirli bilən Paris məhkəməsinin qərarına münasibətinə diqqət çəkib.
Çelik deyib: “Fransa və bütövlükdə Avropadakı korrupsiya qalmaqalına münasibət bildirən Makron və onun kimiləri hadisələri demokratik dəyərlərin qorunmasına prinsipial münasibət kimi təqdim edirlər. Türkiyədə korrupsiya ittihamlarına dair məhkəmə prosesləri isə bir növ “demokratik prinsiplərin pozulması” kimi təqdim olunur. Bu, şübhəsiz ki, ikili standartların nümayişidir”. O vurğulayıb ki, Makron öz ölkəsində məhkəmələrin qərarlarını Fransa demokratiyasının keyfiyyətinin göstəricisi adlandırıb. Parisin xaricdəki analoji proseslərə münasibəti isə kökündən fərqlidir. “Belə qərəzlilik Fransaya təkcə Avropadan kənarda deyil, həm də Aİ daxilində inamın azalmasına gətirib çıxarır”, -deyə Çelik qeyd edib.
Ankara
Bölmənin digər xəbərləri
