Üçüncü “Yüksəliş” müsabiqəsinin final mərhələsinin açılış mərasimi keçirilib
Bakı, 15 iyul, AZƏRTAC
İyulun 15-də Bakı Ekspo Mərkəzində üçüncü “Yüksəliş” müsabiqəsinin final mərhələsinin rəsmi açılış mərasimi keçirilib.
AZƏRTAC xəbər verir ki, tədbirdə gənclər və idman nazirinin müavini, İşçi qrupunun rəhbəri Fərhad Hacıyev çıxış edib. O, “Yüksəliş” müsabiqəsi finalçılarına səslənərək istedadlı kadrların seçilməsi, inkişaf etdirilməsi üzrə layihənin keçirilməsində yaxından iştirak etdikləri üçün qürur hissi duyduğunu bildirib. Fərhad Hacıyev onu da əlavə edib ki, finalçılar arasında ötən illər müsabiqədə iştirak etmiş namizədlərin çoxluq təşkil etməsi sevindirici haldır. Bunun müsabiqənin ictimaiyyət tərəfindən yüksək qiymətləndirilməsinin və iştirakçıların etimadını qazanmasının göstəricisi olduğunu bildirən İşçi qrupunun rəhbəri sonda hər bir finalçıya uğurlar arzulayıb, onların final mərhələsinədək gəlib çatmasının qalibiyyətə bərabər olduğunu qeyd edib.
Tədbir Təşkilat Komitəsi üzvlərinin çıxışları ilə davam edib. Çıxışlarda “Yüksəliş” müsabiqəsinin hər il yeni nəsil idarəçilərin aşkara çıxarılması və formalaşmasında oynadığı əhəmiyyətli rol vurğulanıb, günümüzdə idarəçiliyin tələblərinə uyğun olaraq rəqabətli insan kapitalının önəmi diqqətə çatdırılıb.
İqtisadiyyat naziri Mikayıl Cabbarov insan kapitalının, kadr potensialının artırılması, bacarıqlı kadrların önə çıxarılması məqsədilə həyata keçirilən “Yüksəliş” müsabiqəsinin önəmini vurğulayıb, müsabiqənin intellektual səviyyəsi və idarəçilik keyfiyyətləri yüksək olan gələcəyin liderlərinin dəstəklənməsi və ölkədə rəqabətqabiliyyətli insan kapitalının inkişafını təmin etmək məqsədilə atılmış mühüm addım olduğunu qeyd edib. İqtisadiyyat naziri müsabiqənin finalçılarına idarəçilik sənətinin incəliklərinə dərindən yiyələnmələrini tövsiyə edib, onlara bu sahədə uğurlar arzulayıb.
Əmək və əhalinin sosial müdafiəsi naziri Sahil Babayev bildirib ki, Azərbaycan hazırda iqtisadi, sosial, mədəni və idman sahələri başda olmaqla əksər sahələrdə ən dinamik dövrünü yaşayır. Belə bir dövrdə gənclərin ölkəmizin inkişafına dəstək olması üçün “Yüksəliş” müsabiqəsi əvəzsiz bir imkan yaradır.
Dövlət İmtahan Mərkəzinin Direktorlar Şurasının sədri Məleykə Abbaszadə gənclərin inkişafına, təhsil sahəsinə, mütəxəssis hazırlığına hər zaman dövlətçiliyin və cəmiyyət həyatının ən vacib, strateji əhəmiyyətli sahəsi kimi yanaşılmasında Heydər Əliyev məktəbinin təkanverici rolunu vurğulayıb. O bildirib ki, Ulu Öndər Heydər Əliyev gənclərin yaxşı təhsil almaqla yanaşı, vətənpərvər ruhda yetişməsi üçün lazımi tədbirlər görürdü. Bu növ təşəbbüslərin ölkəmizdə davam etməsi üçün “Yüksəliş” müsabiqəsinin təşkil olunması əhəmiyyətli və zəruri addımdır.
Müsabiqənin əvvəlki dörd mərhələsini uğurla başa vuran 109 nəfər iştirakçının mübarizə apardığı final mərhələsi iyulun 16-da yekunlaşacaq.
Xatırladaq ki, fevralın 17-dən qeydiyyatına start verilən üçüncü “Yüksəliş” müsabiqəsinə 13 min 474 iştirakçı müraciət edib. Müsabiqənin 20 qalibini bir il ərzində idarəçi rəhbərlərdən - böyük şirkətlərin top-menecerlərindən və dövlət orqanlarının rəhbərlərindən fərdi karyera məsləhətləri almaq imkanı, kadr ehtiyatı bankına daxil edilmə və 20 min manat dəyərində pul mükafatı gözləyir.
“Yüksəliş” müsabiqəsi Prezident İlham Əliyevin 2019-cu il 26 iyul tarixli Sərəncamına əsasən təsis olunub. Müsabiqə 5 mərhələdən - qeydiyyat, onlayn seçim, əyani, yarımfinal və finaldan ibarətdir.
Dövlətimizin başçısı 2022-ci il dekabrın 20-də üçüncü “Yüksəliş” müsabiqəsinin keçirilməsi ilə bağlı Sərəncam imzalayıb.
Bölmənin digər xəbərləri
