UEFA ötən mövsümün yekunlarına əsasən üç ən yaxşı futbolçunun adını elan edib
Bakı, 16 avqust, AZƏRTAC
Avropa Futbol Assosiasiyaları İttifaqı (UEFA) 2016/2017-ci illər mövsümünün yekunlarına əsasən qitənin ən yaxşı oyunçusu adına iddiaçıların üçlüyünü elan edib. Üçlüyə İspaniyanın “Barselona” və “Real” klublarının hücumçuları Lilonel Messi və Kriştianu Ronaldu, habelə İtaliyanın “Yuventus” komandasının qapıçısı Canluici Buffon daxildir.
AZƏRTAC UEFA.com saytına istinadla bildirir ki, nominantların son siyahısı ötən mövsümdə Çempionlar Liqasının və Avropa Liqasının qrup mərhələsində iştirak etmiş 80 klubun məşqçiləri, həmçinin UEFA-ya daxil olan hər bir assosiasiyanı təmsil edən 55 jurnalist arasında səsvermənin yekunlarına əsasən müəyyən edilib. Bu halda məşqçilər öz klubunun futbolçularına səs verə bilməzdilər.
Qalibin adı avqustun 24-də Monakoda, 2017/2018-ci illər mövsümünün Çempionlar Liqasının qrup mərhələsində püşkatma zamanı təntənəli mərasimdə elan ediləcək.
Avropada ilin ən yaxşı oyunçusuna mükafat 2010/11-ci illər mövsümündən başlayaraq UEFA tərəfindən təqdim edilir. Messi və Ronaldu hərəsi iki dəfə bu mükafata layiq görülüb. 2012-ci ildə mükafatın sahibi ispaniyalı Andres İntesta, 2013-cü ildə isə fransız Frank Riberi olub.
Bölmənin digər xəbərləri
