“Üfüq” Karyera İnkişaf Proqramının final mərhələsi keçirilib
Bakı, 22 iyun, AZƏRTAC
Kənd Təsərrüfatı Nazirliyi və “Yüksəliş” İctimai Birliyi arasında əməkdaşlıq çərçivəsində həyata keçirilən “Üfüq” Karyera İnkişaf Proqramının iyunun 22-də final mərhələsi təşkil olunub.
AZƏRTAC xəbər verir ki, tədbir Azərbaycan Respublikasının Dövlət Himninin səsləndirilməsi və Vətən uğrunda mübarizədə canından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Kənd təsərrüfatı naziri Məcnun Məmmədov açılış nitqi ilə çıxış edərək bildirib ki, Prezident İlham Əliyevin rəhbərliyi ilə ölkəmizdə qeyri-neft sektorunun, xüsusilə də kənd təsərrüfatının inkişafı prioritet istiqamət olaraq müəyyənləşdirilib. Son illərdə aqrar sahədə aparılan ardıcıl və sistemli islahatlar, müasir texnologiyaların geniş tətbiqi, infrastrukturun yenilənməsi və dövlət dəstəyi mexanizmlərinin təkmilləşdirilməsi kənd təsərrüfatının dayanıqlı, rəqabətqabiliyyətli inkişafına əhəmiyyətli töhfə verir.
Aqrar siyasətin uğurlu icrasının təkcə infrastruktur və texnologiya ilə deyil, bu sahədə çalışan peşəkar, savadlı və məsuliyyətli insan resursları ilə birbaşa bağlı olduğunu deyən nazir qeyd edib ki, “Üfüq” Karyera İnkişaf Proqramı kənd təsərrüfatı sistemində insan kapitalının inkişafı, liderlik yolunda əhəmiyyətli addımların atılması baxımından önəmli bir platforma olacaq.
Gənclər və idman nazirinin müavini, “Yüksəliş” müsabiqəsinin İşçi Qrupunun rəhbəri Fərhad Hacıyev çıxışında “Üfüq” Karyera İnkişaf Proqramının ölkəmizdə aqrar sahədə peşəkar idarəçi, qabaqcıl mütəxəssis potensialının aşkarlanması məqsədilə ərsəyə gəlmiş mühüm təşəbbüs olduğunu bildirib.
Onun sözlərinə görə, bu müsabiqə proqressiv düşüncə, çevik idarəçilik bacarıqlarına malik peşəkarları aşkara çıxarmaqda, onların potensialını lazımi sahələrə yönləndirməkdə, eyni zamanda, peşəkar kadrların dəyərləndirilməsində və dəstəklənməsində böyük əhəmiyyət daşıyır.
Həmçinin qeyd olunub ki, müsabiqənin bütün mərhələləri tam şəffaf və qərəzsiz şəkildə həyata keçirilib. Bu prosesdə “Yüksəliş” müsabiqəsinin artıq ölkə üzrə etibarlı, peşəkar təşkilati heyətinin iştirakı, onların illərlə formalaşmış qiymətləndirmə təcrübəsi və metodoloji dəstəyi “Üfüq” proqramına əlavə güc, keyfiyyət gətirib. Məhz bu əməkdaşlıq sayəsində iştirakçıların bilik, bacarıq və liderlik potensialı obyektiv əsaslarla qiymətləndirilib, nəticədə yüksək potensiala malik kadrlar müəyyənləşdirilib.
Tədbirdə çıxış edən natiqlər müsabiqə iştirakçılarına uğurlar arzulayıb, qaliblərin qazanacağı təcrübə və biliklərin ölkəmizin kənd təsərrüfatının inkişafına layiqli töhfələr verəcəyinə əminliyini ifadə ediblər.
Diqqətə çatdırılıb ki, Kənd Təsərrüfatı Nazirliyi və “Yüksəliş” İctimai Birliyi arasında imzalanmış Əməkdaşlıq Memorandumuna əsasən təşkil olunan “Üfüq” Karyera İnkişaf Proqramı üzrə müsabiqədə Nazirliyin strukturuna daxil olan və strukturuna daxil olmayan tabeliyindəki digər qurumlarda inzibati vəzifə tutan, ali təhsilli 2771 nəfər qeydiyyatdan keçib, onlardan 2327 nəfər onlayn seçim - ümumi biliklərin qiymətləndirilməsi mərhələsində iştirak edib. İkinci mərhələdə uğur əldə etmiş 1331 namizəd növbəti mərhələyə keçib. Əyani seçim, yəni qabiliyyət üzrə imtahanda iştirak edən 1124 nəfərdən 205 nəfəri final mərhələsində iştirak hüququ qazanıb.
Finalda müsabiqənin əvvəlki üç mərhələsini uğurla başa vuran 191 iştirakçı mübarizə aparıb. Müsabiqənin final mərhələsi “qiymətləndirmə konfransı” (assessment conference) formatında keçirilib. ABŞ, Rusiya, Avropa ölkələrində geniş yayılan bu format böyük sayda insanların potensialını qiymətləndirmək üçün istifadə olunur.
İştirakçıların mübarizəsi müxtəlif keyslər üzərindən davam edib. Onların 6 səriştəsi - liderlik, komandada işləmə, dəyişikliklərin və innovasiyaların idarə olunması, strateji düşünmə, nəticələrə yönəlmə və effektivliyin idarə edilməsi bacarıqları ekspertlər tərəfindən qiymətləndirilir. Keyslər müasir dünya təcrübəsi əsasında və qabaqcıl format üzərində hazırlanıb, Azərbaycanın kənd təsərrüfatı, insan resursları, idarəetmə və yenidənqurma sahələrini ehtiva edir.
Müsabiqənin nəticələri 3 iş günü ərzində açıqlanacaq. Qalib gələn 25 iştirakçı fərdi inkişaf proqramına cəlb olunaraq müxtəlif təlimlərdə, kouçinq sessiyalarında, komanda quruculuğu tədbirlərində və Kənd Təsərrüfatı Nazirliyinin idarəçi rəhbərləri ilə mentorluq proqramında iştirak edəcəklər.
Qeyd edək ki, müsabiqənin əsas məqsədi Kənd Təsərrüfatı Nazirliyində intellektual səviyyəsi yüksək olan perspektivli kadrların müəyyən edilməsi, onların inkişaf etdirilməsi, dəstəklənməsi və onların karyera inkişafına şərait yaratmaqdır.
Bölmənin digər xəbərləri
