Ukrayna millisinin baş məşqçisi: Azərbaycandan daha zəif çıxış etdiyimizi düşünmürəm
Bakı, 9 sentyabr, AZƏRTAC
“Azərbaycan millisindən daha zəif çıxış etdiyimizi düşünmürəm. Sadəcə hücumlarda nöqsanlarımız oldu”.
AZƏRTAC xəbər verir ki, bu sözləri Ukrayna millisinin baş məşqçisi Sergey Rebrov DÇ-2026-nın seçmə mərhələsində Azərbaycan yığması ilə 1:1 hesablı heç-heçə etdikləri oyundan sonra təşkil olunmuş mətbuat konfransında deyib.
O, tribunadan komandasına dəstək verən azarkeşlərə təşəkkür edib: “Biz heç bir komandaya yuxarıdan aşağı baxmırıq. Bu gün meydança ilə bağlı müəyyən problemlərlə qarşılaşdıq və bu səbəbdən bizim üçün çətin oldu. Azarkeşlərdən üzr istəyirəm. Hazırda heyətdə zədəli futbolçularımız var. Çətin günlərdən keçirik. Nəticədən asılı olmayaraq, komandamıza dəstək olmalıyıq. Nəzərə almalıyıq ki, Azərbaycan seçməsinin heyətindəki futbolçuların əksəriyyəti avrokuboklarda çıxış edirlər”.
Qeyd edək ki, millimiz seçmə mərhələnin ilk matçında İslandiyaya 0:5 hesabı ilə uduzub.
Bölmənin digər xəbərləri
