Ukrayna və Macarıstan arasında yeni sərhəd-keçid məntəqəsi açılıb
Kiyev, 9 aprel, AZƏRTAC
Ukrayna-Macarıstan sərhədində “Böyük Saray – Nodqodos” adlı yeni keçid məntəqəsi rəsmi olaraq açılıb.
AZƏRTAC xəbər verir ki, bu barədə Ukraynanın xarici işlər naziri Andrey Sibiqa sosial media səhifəsində məlumat verib. “Bu, Ukrayna və Macarıstanın birgə səylərinin nəticəsidir. Bu, mehriban qonşuluq və Ukraynanın Avropa İttifaqına doğru inamlı hərəkətinin simvoludur. Sərhəd infrastrukturunun və yeni keçid məntəqələrinin yaradılması bu gün Ukraynanın davamlılığına, yeni təchizat zəncirlərinə, iqtisadi potensialına və Avropaya inteqrasiyasına investisiyadır. Avropa evinə aparan Ukrayna və macar xalqlarının dostluğu simvoludur”, - deyə nazir qeyd edib.
Yeni keçid məntəqəsi gün ərzində 200-ə yaxın avtomobili və 600-ə yaxın piyadanı qəbul edə bilir. Bu, sərhədyanı rayonları və qonşu ölkələri bir-birinə yaxınlaşdıracaq və sərhəd boyu digər keçid məntəqələrində sıxlığın aradan qaldırılmasına kömək edəcək.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
