Ukraynalı nazir: Sülhməramlılarla bağlı ideya hərbçilərini göndərməyə hazır olan ölkələrlə icra mərhələsindədir
Kiyev, 17 mart, AZƏRTAC
Atəşkəs rejiminə riayət olunmasına nəzarət etmək üçün Ukraynada sülhməramlı missiyanın yerləşdirilməsi ideyası artıq öz hərbi kontingentini göndərməyə hazır olan ölkələrlə icra mərhələsindədir.
AZƏRTAC xəbər verir ki, bunu “RBC-Ukrayna”ya müsahibəsində Ukraynanın xarici işlər naziri Andrey Sibiqa deyib.
Nazir vurğulayıb: “Biz artıq öz qoşunlarını yerləşdirməyə hazır olan ölkələrin siyahısını gələcək təhlükəsizlik zəmanətləri sisteminin mühüm effektiv elementləri kimi başa düşürük. Ona görə də hazırda detalları müzakirə etmək mərhələsindəyik. Detallar coğrafiya, kəmiyyət, mandatdan ibarətdir”.
O əlavə edib ki, ABŞ-ın sülhməramlı missiyaya dəstəyi son dərəcə mühümdür.
“Amerika bizə lazımdır, ABŞ-ın iştirakı və Amerikanın liderliyi bizim üçün zəruridir”, -deyə Ukrayna diplomatiyasının rəhbəri vurğulayıb.
Rusiyanın Ukraynada sülhməramlı kontingentin yerləşdirilməsi ideyası ilə bağlı dəfələrlə səsləndirdiyi qəti fikir ayrılığını şərh edən Xarici İşlər Nazirliyinin rəhbəri vurğulayıb: “Biz milli maraqlarımıza uyğun olan və Ukraynanın təhlükəsizliyinə uzun müddət zəmanət verəcək hər şeyi edəcəyik”.
A.Sibiqa qeyd edib: “Sadəcə hərbi əməliyyatların olmaması bizi qane etmir. Sülh təkcə müharibənin olmaması deyil. Söhbət uzunmüddətli perspektivdə Rusiya təcavüzünün yenidən başlanmasının qarşısını almaqla daimi, davamlı, ədalətli sülhdən gedir. Buna görə də müttəfiqlərimizlə birlikdə səylərimiz məhz buna yönəldilib”.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
