Ümummilli liderimizin təşəbbüsü ilə əsası qoyulan ənənəyə uyğun olaraq, Heydər Əliyevi şəxsən tanıyan Rusiyanın yüksək vəzifəli hərbçiləri və görkəmli siyasətçiləri hər il mayın 10-da Moskvadakı səfirliyimizə toplaşırlar. Heydər Əliyev hər il bu görüşün iştirakçılarına təbrik məktubu göndərirdi. Bu dəfə onlara təbrik məktubunu Azərbaycan Respublikasının Prezidenti İlham Əliyev ünvanlamışdır. Məktubda deyilir: “Hər il Qələbə gününü Azərbaycanın Moskvadakı səfirliyində qeyd etmək artıq ənənəyə çevrilmişdir. Həmin gün ümumi evimizə toplaşan ölkəmizin bütün dostlarını Azərbaycan Prezidentinin təbrik etməsi də ənənəvi olmuşdur. Sizin hamınızı, Azərbaycanda xidmət etmiş sərkərdələri, siyasətçiləri, diplomatları, elm və mədəniyyət xadimlərini, xalqlarımızın böyük əsgəri rəşadətini əziz tutanların hamısını Qələbə bayramı münasibətilə təbrik edirəm. Əminəm ki, görüşünüzdə siz faşizm üzərində qələbə qazanılmasında Bakı neftinin çox böyük rol oynadığını xüsusi qeyd edəcəksiniz. Sizin görüşünüz Azərbaycan xalqının ümummilli lideri Heydər Əliyevin doğum günü ərəfəsində keçirilir. O, bizim hər birimizin xatirəsində xalqımızın dahi oğlu kimi qalacaq, onun çox böyük əsəri olan Azərbaycan əsrlər boyu yaşayacaqdır. Son illər ölkələrimiz arasında dostluq və əməkdaşlıq münasibətləri daha da inkişaf etmək üçün yeni təkan almışdır. Siz Azərbaycan ilə Rusiya arasında strateji əməkdaşlığın – xalqlarımızın qarşılıqlı münasibətlərin səmərəli səviyyəsinə nail olmaq əzmini əks etdirən əməkdaşlığın keyfiyyətcə yeni mərhələsinin şahidlərisiniz. Əminəm ki, müharibə illərinin sərt sınaqlarından çıxan dostluğumuz bundan sonra da ülvi xeyirxahlıq və sülh amallarına xidmət edəcəkdir”.

Azərbaycanın Rusiyadakı səfiri Ramiz Rizayev gecəni açaraq, ümummilli liderimiz Heydər Əliyevin nurlu xatirəsinin bir dəqiqəlik sükutla yad olunmasıni təklif etdi. Sonra çıxış edən səfir dedi ki, faşizm üzərində Qələbə günü Müstəqil Dövlətlər Birliyinin bütün ölkələri üçün əziz bayramdır. O xatırlatdı ki, Azərbaycan səfirliyində bu böyük bayramın keçirilməsi ideyası ümummilli liderimiz Heydər Əliyevə məxsusdur. Səfir vurğuladı ki, hər belə görüşdən sonra Prezident Heydər Əliyev ona zəng vurur və görüşün necə keçməsi ilə, iştirakçılardan hər birinin özünü necə hiss etməsi ilə maraqlanırdı. Axı, o, hamını şəxsən tanıyır və xatırlayırdı. R.Rizayev dedi: “Biz çox təəssüflənirik ki, Heydər Əliyev bu gün bizimlə deyildir. Lakin onun siyasəti davam etdirilir, çünki Azərbaycan xalqı onun siyasi varisi İlham Əliyevi özünə yekdilliklə Prezident seçmişdir”.

Gecədə çıxış edən natiqlər dedilər ki, Azərbaycan xalqının dahi oğlu Heydər Əliyevin doğum günündə onun əfsanəvi həyatı, siyasət meydanında parlaq qələbələri, ən çətin vaxtlarda qəbul etdiyi müdrik və qeyri-standart qərarlar ehtiramla xatırlanır. Onlar bildirdilər ki, hələ Azərbaycanda xidmət etdikləri illərdə Heydər Əliyevin nəinki Böyük Vətən müharibəsi veteranlarının, hərbçilərin, həm də sadə insanların problemlərinə çox diqqətlə yanaşdığını görüb layiqincə qiymətləndirirdilər. Gecənin iştirakçıları Azərbaycan Prezidenti İlham Əliyevin görkəmli siyasi xadimin xəttini, əsasını qoyduğu ənənələri davam etdirməsini yüksək qiymətləndirdilər. Belə bir fikir də dəfələrlə səsləndi ki, Böyük Vətən müharibəsində faşizm üzərində qələbəni Sovet İttifaqının bütün xalqları birgə təmin etmişdilər, lakin bu qələbəyə Azərbaycan, onun nefti xüsusi töhfə vermiş, Azərbaycanın yüz minlərlə övladı döyüş meydanında qəhrəmancasına həlak olmuşdur.

Ordu generalı K.Koçetov çıxışında həmin dövrdə Zaqafqaziya Hərbi Dairəsi Hərbi Şurasının üzvü olan Heydər Əliyevin rəhbərliyi altında xidmət etdiyini xatırlayaraq dedi: “Mən nəinki Azərbaycan xalqının, böyük Azərbaycanın, həm də bütün Sovet dövlətinin bu görkəmli xadimi ilə görüşlərimi xatırlayıram. O, ölkəmizin qüdrətli olması və tərəqqisi üçün çox işlər görmüşdür. O, həm də Rusiya-Azərbaycan dostluğunun təcəssümü olmuşdur və indi bu ənənəni iki dost dövlətin prezidentləri davam etdirirlər”. K.Koçetov Azərbaycanın yeni Prezidenti İlham Əliyevin rəhbərliyi altında ölkəmizə böyük uğurlar arzuladı.

RF Təhlükəsizlik Şurasının sabiq katibi V.Ruşaylo vurğuladı ki, bu gün səfirliyə gələn insanları bir-biri ilə xatirə və ənənələr, ilk növbədə, hazırda bizə yaşamaq imkanı vermiş insanların xatirəsi birləşdirir.

Ordu generalı S.Lebedev Azərbaycanın dahi oğlu Heydər Əliyevi yaxşı tanıdığını, onun xalqlarımız arasında qardaşlıq münasibətlərinin, dostluğun həmişə sarsılmaz tərəfdarı olduğunu, sülhün və təhlükəsizliyin keşiyində həmişə qətiyyətlə dayandığını vurğuladı.

Görüşün sonunda ehtiyatda olan general-polkovnik Aleksandr Kovtunov səfirlikdə ənənəvi qəbulun iştirakçıları adından Azərbaycan Respublikasının Prezidenti İlham Əliyevə təbrik məktubunu oxudu. Məktubda deyilir ki, qonaqpərvər səfirlikdə keçirilən dostluq görüşləri çoxdan bəri gözəl ənənəyə çevrilmişdir və bunun əsası Azərbaycan xalqının ümummilli lideri, görkəmli dövlət xadimi Heydər Əliyevin təşəbbüsü ilə qoyulmuşdur. Sovet Azərbaycanının sosial-iqtisadi və mədəni tərəqqisi də indiki müstəqil Azərbaycan Respublikasının dirçəlişi və möhkəmlənməsi də onun adı ilə bağlıdır. Bu gün biz dərin iftixar hissi ilə qeyd edirik ki, Heydər Əliyev nəinki Azərbaycanın, həm də Rusiyanın şanlı tarixinin bir hissəsidir. O, ömrünün ən yaxşı illərini Rusiyanın qüdrət və əzəmətinin möhkəmlənməsinə həsr etmişdir. Rusiya-Azərbaycan münasibətlərinin həqiqətən dirçəlməsi, bu münasibətlərin qarşılıqlı hörmət, qardaşcasına qarşılıqlı fəaliyyət və əməkdaşlıq ab-havası ilə dolğunlaşması da onun adı ilə bağlıdır. Biz əminik ki, müstəqil Azərbaycanın başçısı vəzifəsində Sizin fəaliyyətiniz ölkələrimiz və xalqlarımız arasında dostluq və əməkdaşlıq münasibətlərinin daha da möhkəmlənməsinə xidmət edəcəkdir. Qoy, dost Azərbaycanın Prezidenti vəzifəsində Sizin fəaliyyətiniz Azərbaycanın daha yaxşı gələcəyi, qardaş Azərbaycan xalqının tərəqqisi və firavanlığı, Rusiya Federasiyası ilə Azərbaycan Respublikası arasında dostluq və strateji tərəfdaşlıq münasibətlərinin daha da möhkəmlənməsi naminə parlaq nailiyyətlərlə əlamətdar olsun.

Təntənəli qəbulda RF xarici işlər nazirinin müavini V.Loşşinin, tanınmış Rusiya hüquqşünası M.Baqlay, Rusiyanın keçmiş müdafiə naziri İ.Rodionov, Dövlət Dumasının deputatları, habelə Moskvadakı Azərbaycan diasporunun nümayəndələri də iştirak edirdilər.

Rəsmi hissədən sonra Azərbaycan və Rusiyanın mədəniyyət və incəsənət xadimlərinin iştirakı ilə konsert oldu.