Ümumrusiya Azərbaycan Konqresi diaspor təşkilatları ilə videoforumlar keçirəcəkdir
Moskva, 5 dekabr (AZƏRTAC). Xəbər verdiyimiz kimi, Bakıda “BakuTel-2013” XIX Azərbaycan Beynəlxalq telekommunikasiya və informasiya texnologiyaları sərgisinin rəsmi açılışında Azərbaycan Prezidenti İlham Əliyev onlayn videokonfrans sistemi vasitəsilə Rusiya, ABŞ, Almaniya, Fransa, Hollandiya, Ukrayna və Türkiyədə fəaliyyət göstərən diaspor təşkilatlarının nümayəndələri qarşısında çıxış etmişdir.
Dövlətimizin başçısı bildirmişdir ki, dünyanın müxtəlif ölkələrində Azərbaycan diaspor təşkilatlarının fəaliyyəti genişlənir, xaricdə yaşayan azərbaycanlılar üçün yeni imkanlar yaranır. Azərbaycan Prezidenti demişdir: “Azərbaycanın dövlət maraqlarının daha da dolğun şəkildə təmin edilməsi üçün diaspor təşkilatlarının rolu çox böyükdür”. Prezident İlham Əliyev vurğulamışdır ki, hazırda güclü diaspor güclü Azərbaycanın imkanlarını genişləndirir. Eyni zamanda, xaricdə yaşayan hər bir azərbaycanlı haqlı olaraq qürur hissi keçirir ki, bu gün dünyada güclü Azərbaycan dövləti vardır. Azərbaycan Prezidenti demişdir: “Siz həmişə bilirsiniz və bilməlisiniz ki, sizin arxanızda güclü, güclənən, inkişafda olan, bu gün dünya miqyasında böyük hörmətə malik Azərbaycan dövləti dayanır. Eyni zamanda, sizin fəaliyyətiniz Azərbaycanın dövlət maraqlarının qorunması baxımından bizim üçün çox vacibdir. Bax, bu birlik bizi daha da gücləndirir”.
“Dünya Azərbaycanlılarının onlayn Forumu” zamanı Ümumrusiya Azərbaycan Konqresinin (ÜAK) icraçı direktoru İlqar Hacıyev dünyanın müxtəlif guşələrində yaşayan həmvətənlərimizə göstərilən diqqət və qayğıya görə Azərbaycan Prezidenti İlham Əliyevə təşəkkür etmişdir. O bildirmişdir ki, ÜAK Rusiya ərazisində yaşayan həmvətənlərimizin birləşməsi istiqamətində məqsədyönlü tədbirlər həyata keçirir. Qloballaşan dünyada getdikcə daha mühüm əhəmiyyət kəsb edən informasiya-kommunikasiya texnologiyalarının inkişafına Azərbaycanda xüsusi önəm verilməsinin sevindirici hal olduğunu vurğulayan İ.Hacıyev Rusiyada diaspor təşkilatları arasında da belə videoforumların keçirilməsini təklif etmişdir. O, belə forumların Rusiya Federasiyasının müxtəlif şəhərlərində yaşayan soydaşlarımızla əlaqələrin genişləndirilməsində, problemlərinin operativ həll olunmasında dəyərli vasitə olduğunu vurğulamışdır.
ÜAK-ın idarə heyətinin sədri, “Azərbaycan Konqresi” qəzetinin baş redaktoru Rüstəm Arifcanovun sözlərinə görə, Bakı ilə Moskva, İstanbul və digər şəhərlər arasında onlayn əlaqə yaradılması çox uğurlu ideyadır. Videoəlaqə vasitəsilə müxtəlif ölkələrdə yaşayan azərbaycanlılar bir-birinin yaşayışı, fəaliyyəti ilə daha yaxından tanış ola biləcəklər. R.Arifcanov demişdir: “Ölkələrimizin, problemlərimizin müxtəlifliyinə baxmayaraq, ümumi ideoloji və metodoloji vəzifələrimiz vardır. Azərbaycan Prezidentinin bizə müraciəti olduqca vacibdir. Onlayn konfrans zamanı Prezident İlham Əliyev hamımıza, eyni zamanda, hər birimizə müraciət etmişdir. Dövlət başçısının “sizin arxanızda güclü, güclənən Azərbaycan dayanıb” sözlərini eşidəndə qürur hissi keçirməmək olmur”.
ÜAK-ın Moskva vilayəti üzrə nümayəndəliyinin rəhbəri Araz Mürsəliyev qeyd etmişdir ki, “Dünya Azərbaycanlılarının onlayn Forumu” çərçivəsində Azərbaycan Prezidenti İlham Əliyevin dünya diaspor təşkilatlarının nümayəndələrinə müraciəti xaricdə yaşayan hər bir azərbaycanlı üçün əlamətdar hadisədir. Azərbaycan dövlətinin başçısı bildirmişdir ki, xarici ölkələrdə yaşayan həmvətənlərimiz respublikamızın dövlət maraqlarını daim müdafiə etməlidirlər. Rusiyanın Azərbaycan diasporu bu ölkədə yaşayan çoxsaylı həmvətənlərimizi öz ətrafında birləşdirməklə, qonşu ölkə ilə mehriban münasibətlərin qurulmasına öz töhfəsini verir. A.Mürsəliyev demişdir: “Diaspor rəhbəri kimi deyə bilərəm ki, biz qüdrətli Azərbaycan dövlətinin dəstəyini daim hiss edirik”. ÜAK-ın Moskva vilayəti üzrə nümayəndəliyinin rəhbərinin sözlərinə görə, Diasporla İş üzrə Dövlət Komitəsinin sədri Nazim İbrahimovun da iştirak etdiyi forumda bu cür görüşlərin mütəmadi təşkil olunması qərara alınmışdır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
