Bakı, 11 mart, AZƏRTAC

Aqrar Elm və İnnovasiya Mərkəzinin Üzümçülük və Şərabçılıq Elmi-Tədqiqat İnstitutunda yeni fəaliyyətə başlamış Üzümçü-Şərabçı Gənclər Birliyinin üzvləri “Üzümü tanıyaq və tanıdaq” layihəsinin icrasına başlayıb. Layihə çərçivəsində ilk maarifləndirici təlim Abşeron rayonundakı fermer təsərrüfatında keçirilib.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, institutun direktoru Vüqar Səlimov “Üzümü düzgün budayaq, bol məhsul əldə edək” şüarı ilə keçirilən təlimə əsasən gənclərin cəlb edildiyini deyib. Onun sözlərinə görə, təlim zamanı ali məktəblərdə təhsil alan gənclərə, eləcə də gələcəkdə üzümçülük ixtisasını əsas götürəcək aqronom mütəxəssislərə alimlər tərəfindən qış mövsümündə üzümçülükdə ən vacib tədbirlərdən biri olan quru budamanın tələbləri izah olunub. Bildirilib ki, budamanın əsas məqsədi tənəyə uyğun formanın və müvafiq gözcük yükünün verilməsi, bar budaqlarının fəzada düzgün və nizamlı şəkildə yerləşdirilməsi, tənəkdə uzun illər sabit və yüksək məhsulun əldə olunması, uzunömürlülüyünün təmin edilməsi, dərmanlama, məhsul yığımı və digər qulluq işlərinin asanlaşdırılması, tənəkdə əl əməyinin azaldılmasıdır.

Gənclərin diqqətinə çatdırılıb ki, budama zamanı sortların bioloji xüsusiyyətləri nəzərə alınmalıdır. “Məsələn, Azərbaycanda, Orta Asiyada yetişən yerli, eləcə də digər sortlarda barlı tumurcuqlar daha çox zoğun orta hissəsində - 5-12-ci gözcüklərdə, yüksək boy gücünə malik olan sortlarda isə 20-ci gözcüyə qədər davam edir. Avropa sortlarında, xüsusən də texniki sortlarda zoğun əsasına doğru yerləşən gözcüklər, yəni 3-8-ci gözcüklərin barvermə qabiliyyəti yüksək olur. Bəzi sortlara az yük verdikdə, o cümlədən zoğları qısa kəsdikdə bar itirilir, həmçinin gözcüklərdən iki və daha çox yaşıl zoğ inkişaf edir, kollanma güclü gedir, zoğlar kəskin böyüyür. Belə sortlarda barlı gözcüklər zoğun orta hissəsində, 6-12-ci gözcükdə yerləşir. Bu baxımdan “Kişmişi” sortlarını, “Ağadayı” kimi sortların bar zoğlarının daha uzun kəsilməsi məqsədəuyğundur. Ümumiyyətlə, Azərbaycan şəraitində güclü və suvarılan torpaqlarda bir sıra yerli və introduksiya olunmuş süfrə üzüm sortlarının - “Qara kişmişi”, “Qara keçiməməsi”, “Hüseyni”, “Sultanina”, “Türk sultanı”, “Ağadayı”nın oval variasiyası, “Nimrəng”, “İtaliya muskatı”, “Hamburq muskatı”nın bar budaqlarını uzun budamaq və 3-5 qollu yelpik formasının verilməsi məqsədəuyğundur”, - deyə Vüqar Səlimov bildirib.

Üzümçü-Şərabçı Gənclər Birliyinin sədri Allahverdi Hüseynzadə qeyd edib ki, “Könüllülər ili” çərçivəsində reallaşdırılan layihə gənclərin maarifləndirilməsini əsas götürməklə digər regionlarda da keçiriləcək.

Növbəti sahə təlimləri üzümçülükdə aktual olan digər becərmə texnologiyalarına həsr olunacaq.