DÜNYA
Vaşinqton Tayvanın vitse-prezidentinin ABŞ-a səfər edəcəyini təsdiqləyib
![Vaşinqton Tayvanın vitse-prezidentinin ABŞ-a səfər edəcəyini təsdiqləyib](/files/2023/2/1200x630/16896318482139329211_1200x630.jpg)
Bakı, 18 iyul, AZƏRTAC
Tayvanın vitse-prezidenti və adanın hakim Demokratik Tərəqqi Partiyasının sədri Lai Qingden ABŞ-a səfər edəcək.
AZƏRTAC TASS-a istinadla xəbər verir ki, bunu ABŞ dövlət katibi Entoni Blinken söyləyib.
Blinkenin sözlərinə görə, ABŞ rəsmiləri tayvanlı siyasətçinin Paraqvay prezidenti Santiaqo Penanın andiçmə mərasimində iştirak etmək üçün ABŞ ərazisindən tranzit ölkə kimi istifadə edəcəyini gözləyirlər.
Dövlət Departamentində jurnalistlərə açıqlama verən Blinken bildirib ki, Vaşinqton Tayvan boğazında sülh və sabitliyin qorunmasına sadiqdir. O, ABŞ-ın boğazda status-kvonu dəyişmək arzusunda olmadığını və digər tərəflərdən də eyni siyasəti gözlədiyini vurğulayıb.
Dövlət katibi qeyd edib ki, Vaşinqton bütün “maraqlı tərəflər”dən fikir ayrılıqlarını müstəsna olaraq sülh yolu ilə həll etməyi gözləyir.