Vəkil Xəyalə Abdullazadə: Ermənistanın iddiaları beynəlxalq məhkəmələr tərəfindən bir daha rədd olundu
Bakı, 16 iyul, AZƏRTAC
Bütün demokratik, suveren dövlətlərdə olduğu kimi, Azərbaycan da öz ərazi bütövlüyünü, habelə dövlət sərhədlərinin mühafizəsini həyata keçirmək üçün Laçın yolunun girişində sərhəd-nəzarət buraxılış məntəqəsi təsis edib. Bu hüquq Azərbaycanın dövlətinin sərhədlərini mühafizəsi üzrə suveren hüququdur. Bundan narahat olan Ermənistan İnsan Hüquqları üzrə Avropa Məhkəməsinə (AİHM) müvəqqəti təmin tədbirlərinin tətbiqi ilə bağlı müraciət etmişdi. AİHM-in qaydalarının 39-cu maddəsinə uyğun olaraq, Məhkəmə hər hansı razılığa gələn yüksək tərəfin üzərinə öhdəlik qoyan müvəqqəti tədbirlərin görülməsi barədə qərar çıxara bilər. Müvəqqəti tədbirlər, məhkəmə təcrübəsinə əsasən, yalnız aradan qaldırıla bilinməyən zərər vura biləcək qaçılmaz risklə üzləşdikdə tətbiq olunan təcili tədbirlərdir.
Bu barədə AZƏRTAC-a məxsusi açıqlamasında Vəkillər Kollegiyasının üzvü Xəyalə Abdullazadə deyib.
Onun sözlərinə görə, bu il iyulun 12-də İnsan Hüquqları üzrə Avropa Məhkəməsi müvəqqəti təmin tədbirlərinin tətbiqi ilə bağlı Ermənistanın Azərbaycana qarşı məhkəmə işi üzrə bu ölkənin 2023-cü il 21 iyun tarixli tələbinin tamamilə əsassız olması ilə bağlı qərar qəbul edib. Başqa sözlə, İnsan Hüquqları üzrə Avropa Məhkəməsi öz qərarı ilə Ermənistanın “Laçın dəhlizi boyunca nəqliyyatın hərəkətinə bütün maneələri aradan qaldırmaq və bu barədə Nazirlər Komitəsinə məlumat vermək” tələbinin əsassızlığını bir daha təsdiqləyib. Bununla da Azərbaycanın ərazi bütövlüyü bir daha tanınıb.
İnsan Hüquqları üzrə Avropa Məhkəməsi sərhəd-keçid məntəqəsinin Laçın yolunda nəqliyyatın hərəkətinə maneə törətdiyini və tibbi yardıma ehtiyacı olan şəxslərin təhlükəsiz keçidinin təmin edilməsi üçün Azərbaycanın yurisdiksiyasına daxil olan tədbirlərin görülməsi haqqında 2022-ci il 21 dekabr tarixli qərarının Azərbaycan tərəfindən pozulmasını müəyyən etməyib.
“Eyni zamanda bu yaxınlarda BMT-nin əsas məhkəmə orqanı olan Beynəlxalq Ədalət Məhkəməsi Ermənistanın şikayəti üzrə növbəti qərarını verib. Bu məhkəmənin 2023-cü il 6 iyul tarixli qərarına əsasən, “İrqi ayrı-seçkiliyin bütün formalarının ləğv edilməsi haqqında” Beynəlxalq Konvensiyanın tətbiqi ilə bağlı Ermənistanın Azərbaycana qarşı məhkəmə işi üzrə 2023-cü il 22 fevral tarixli qərarında dəyişiklik edilməsi məqsədilə Ermənistanın 2023-cü il 12 may tarixli tələbi yekdilliklə rədd edilib.
Fikrimizcə, Beynəlxalq Ədalət Məhkəməsi bir daha müstəqil Azərbaycanın öz sərhədlərinə nəzarət etmək hüququnu tanıyıb. Bununla da Azərbaycanın ərazi bütövlüyü bir daha təsdiqini tapıb. Həm AİHM, həm də Beynəlxalq Ədalət Məhkəməsinin qəbul etdiyi həmin qərarlar mütərəqqi və alqışa layiqdir. Bu qərarlar dünya ictimaiyyətinə Azərbaycanın öz suverenliyini beynəlxalq hüquq çərçivəsində, qanunauyğun şəkildə qoruduğunu bir daha göstərdi”, - deyə X.Abdullazadə vurğulayıb.
Bölmənin digər xəbərləri
