Vəkillər Kollegiyasının sədri: “Yüksəliş” müsabiqəsi dövlətinə təmənnasız sevgi göstərən idarəçiləri müəyyənləşdirəcək
Bakı, 25 mart, AZƏRTAC
Azərbaycanda bacarıqlı idarəedici kadrların müəyyənləşdirilməsi və ehtiyat kadr bazasının yaradılmasının təminatına yönəlmiş “Yüksəliş” müsabiqəsi yüksək idarəçilik qabiliyyətinə malik iştirakçıların seçimi mərhələsindədir. Bu seçimlərdə ölkənin müxtəlif sahələrinin nüfuzlu mütəxəssisləri də yaxından iştirak edirlər. “Yüksəliş” müsabiqəsində Azərbaycanda fəaliyyət göstərən tanınmış şəxslərdən ibarət idarəçi rəhbərlər (https://yukselish.az/mentors.html) toplanıb. Vəkillər Kollegiyasının sədri Anar Bağırov da peşəkar heyətin üzvlərindən biridir.
AZƏRTAC xəbər verir ki, sədr uğurlu idarəçiliyin əsas keyfiyyətləri, peşə bacarıqlarının təkmilləşdirilməsi ilə bağlı sualları cavablandırıb.
- Anar müəllim, uğurlu idarəçiliyin əsas xüsusiyyətləri hansılardır?
- Əziz gənclərə səslənirəm. Uğurlu idarəçi olmağınızı müəyyənləşdirmək üçün özünüzə bu sualı verməlisiniz: “Görəsən, mən özümü daxilən idarəçi hiss edirəm?!” Əgər bu suala refleksiv olaraq veriləcək cavabınız “hə”dirsə, o zaman keçək növbəti mərhələyə. Əziz dostlar, uğurlu və effektiv idarəçi olmağın yolu iki əsas keyfiyyət toplusundan keçir. Birinciyə idarəçinin bilavasitə şəxsiyyəti ilə bağlı olan keyfiyyətlər daxildir. İkinciyə isə sonradan qazanılan keyfiyyətlər aiddir. Unutmayın, birinci, yəni ilkin keyfiyyətlərin olmaması sonradan qazanılan keyfiyyətləri istisna edir. Beləliklə, idarəçinin şəxsiyyəti ilə bağlı ən əsas keyfiyyətlər onun təvazökar, dürüst, yəni heç bir halda hiyləyə əl atmayan, fikirlərində səmimi olan və bu səmimiyyəti cəmiyyətə ötürə bilən, qorxmaz, əmin olduğu məqamlarda qərar qəbul etməkdə qətiyyətli və ətrafındakılara etibar edə bilən insan olmasıdır. Xalq dili ilə desək, həmin şəxsin sözü ilə əməli üst-üstə düşməlidir. İkinci, yəni sonradan təcrübə ilə qazanılan keyfiyyətlərə isə əməkdaşlarını motivasiya etmək, mükəmməl kommunikasiya, rəvan ünsiyyət qurmaq, şəxsi nümunə, ideyalarını bölüşə bilmək və tənqidi fikirləri qəbul etmək, istənilən ağır işin öhdəsindən gəlmək bacarıqları daxildir. Sadə dildə desək, işdən qorxmamaq, kiçiklə kiçik, böyüklə böyük olmağı bacarmaqdır.
- İdarəçi olmaq istəyən şəxslərə hansı tövsiyələri verərdiniz?
- Zaman durmadan irəli gedir və idarəçi titulunu qazanmaq nə qədər çətin olsa da, onu qoruyub lazımi keyfiyyətdə saxlamaq daha çətindir. Bununla belə, bunu təmin etmək müəyyən üsullarla mümkündür. Birincisi, peşəkar idarəçi işlədiyi sahədə ətrafındakılardan və o sahədə ixtisaslaşmış şəxslərdən hər zaman daha məlumatlı olmağa çalışmalıdır. Unutmamalıyıq ki, informasiya çağında ən güclü insan məlumatlı insandır. Yalnız məlumatlı olmaq sizi digərlərindən daha güclü və idarəçi kimi işinizin keyfiyyətinə müsbət təsir göstərə bilər. İkincisi, idarəçi ayıq-sayıqlığını əldən verməməklə özünün müşahidə bacarıqlarını daimi inkişaf etdirməkdə maraqlı olmalıdır. Bu xüsusiyyət idarəçinin öz işçilərinin fəaliyyətinin izlənilməsindən daha çox, oxşar sahələrdə çalışan rəhbər işçilərin etdikləri səhvləri müşahidə etmək və düzgün nəticələr çıxarmaqdan ibarətdir. Ümumiyyətlə isə ən əsas tövsiyə özünətənqid xüsusiyyətinin formalaşdırılmasıdır. Tənqid olan yerdə səhvlərdən nəticə çıxarma, səhvlərdən nəticə çıxarılan yerdə isə inkişaf labüddür.
- “Yüksəliş” müsabiqəsinin iştirakçılarından gözləntiləriniz nələrdir?
- Yuxarıda dediklərimin fövqündə daha böyük və mühüm keyfiyyətlər durur ki, o da sizin Vətənə, xalqa və dövlətimizə dönməz və təmənnasız sevginiz, ümumiyyətlə cəmiyyətin hər üzvünə hörmət və qayğıkeşliyinizdir. “Yüksəliş” layihəsinin ən ümdə qayələrindən biri də məhz bu cür gənclərimizin müəyyənləşdirilməsidir.
Mən sizin hər birinizə uğurlar arzulayıram.
Bölmənin digər xəbərləri
