Vyanada “Azərbaycanın mədəni irsinin qorunması: Avstriyanın töhfəsi” adlı fotosərgi açılıb
Vyana, 15 mart, AZƏRTAC
Vyana Azərbaycan Mədəniyyət Mərkəzində “Azərbaycanın mədəni irsinin qorunması: Avstriyanın töhfəsi” adlı fotosərginin açılış mərasimi keçirilib.
AZƏRTAC xəbər verir ki, Azərbaycanın Avstriyadakı səfirliyinin təşkilatçılığı və Azərbaycan Respublikasının Diasporla İş üzrə Dövlət Komitəsinin dəstəyi ilə təşkil olunmuş tədbirdə Vyanadakı diplomatik korpusun təmsilçiləri, səfirlər, beynəlxalq təşkilatların əməkdaşları, ölkə rəsmiləri, yerli ictimaiyyətin nümayəndələri və Avstriyada yaşayan soydaşlarımız iştirak ediblər.
Tədbiri giriş sözü ilə açan Mədəniyyət Mərkəzinin rəhbəri Leyla Qasımova Azərbaycanın müxtəlif bölgələrində mədəniyyət və tarixi abidələrin qorunub saxlanılmasına böyük töhfə verən Avstriya şirkətlərinə minnətdarlığını bildirib.
Öz çıxışında Azərbaycanın Avstriyadakı səfiri Rövşən Sadıqbəyli Azərbaycanın zəngin mədəni irsinin qorunub saxlanmasının Azərbaycan hökumətinin hər zaman prioriteti olduğunu bildirib. O, Azərbaycanın ərazi bütövlüyünün tam bərpasından sonra Qarabağ regionun yenidən qurulması, bərpa və mühafizəsinə yeni təkan verildiyi və bunun ümumxalq missiyaya çevrildiyini diqqətə çatdırıb. Bu xüsusda, UNESCO-nun Ümumdünya İrsi Siyahısında yer alan İçərişəhər, Qız qalası və digər mədəni abidələrin, həmçinin Azərbaycanın Qarabağdakı mədəni və dini irsinin daxil olduğu memarlıq möcüzələrin bərpası və konservasiyasına avstriyalı memarların töhfəsini əks etdirən fotosərginin nümayiş etdirilməsindən məmnunluq hissini duyduğunu qeyd edib. BMT-nin Sivilizasiyalar Alyansı ilə 2021-ci ildə “Mədəniyyət naminə sülh” qlobal çağırışı barədə məlumat verərək, mədəni irsin bərpası və qorunması davamlı sülhə töhfə verəcəyi vurğulanıb.
Diasporla İş üzrə Dövlət Komitəsinin sədr müavini Elşad Əliyev Azərbaycanın 30 ilə yaxın davam edən işğaldan azad edilmiş ərazilərinin tam bərpasından sonra Qarabağ regionunda aparılan bərpa və quruculuq işlərində iştirak edən Avstriya şirkətlərinə təşəkkürünü bildirib.
Azərbaycanda uzun illər fəaliyyət göstərən Avstriya şirkətlərinin nümayəndələri Manfred Vehdorn, Erix Pummer və Roman Brugger təqdimatlarla çıxış edərək, fəaliyyətləri və gördükləri işlər barədə tədbir iştirakçılarına ətraflı məlumat təqdim ediblər.
M.Vehdorn Azərbaycan ilə Avstriya arasında mövcud dost münasibətlərini önə çıxarıb. O, ölkəmizin zəngin mədəni irsini, Ağdamdakı Cümə məscidinin və Şuşada Aşağı Gövhər Ağa və Yuxarı Gövhər Ağa məscidlərinin bərpası barədə məlumat verib. E. Pummer UNESCO-nun Ümumdünya İrsi Siyahısına daxil olan Qız qalası, Şirvanşahlar Sarayı, İçərişəhər, bundan əlavə Məhəmməd məscidi, Bəylər məscidi və Opera və Balet Teatrının bərpası haqqında danışıb. R.Brugger Ağdam Cümə məscidinin bərpası haqqında ətraflı məlumat təqdim edib.
Almaniyanın Qiesen Universitetinin dosenti türkoloq alim Mixael Raynhard Hess çıxışında Şuşanın və ümumiyyətlə Qarabağın Azərbaycanın ədəbiyyat və mədəniyyət tarixindəki zəngin irsi barədə söhbət açıb. İşğal dövründə Şuşa şəhərində törədilmiş dağıntılar və vandalizmin ilk növbədə burada Azərbaycan irsini silmək, onu inkar etmək niyyət ilə edildiyini bildirib. M.R.Hess müəllif olduğu “Şuşanın irsi. Azərbaycan mədəniyyət paytaxtının tarixi və inkişaf yolu” kitabının ingilis dilində nəşrini təqdim edib.
Tədbirin bədii hissəsində görkəmli xanəndə, Xalq artisti Mənsum İbrahimovun rəhbərlik etdiyi “Qarabağ” muğam qrupu musiqili proqram ilə çıxış edib.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
