Xaçaturyanın həbsi həm ermənilər, həm də onların himayədarları üçün kifayət qədər açıq mesajdır
Bakı, 31 iyul, AZƏRTAC
Azərbaycanlılara qarşı törədilmiş kütləvi qırğının birbaşa iştirakçısı olan bir cinayətkarın, erməni əsilli Vaqif Xaçaturyanın “Laçın” dövlət sərhədindən buraxılış məntəqəsində həbs edilməsi ilə bağlı Ermənistan tərəfinin yaratmaq istədiyi süni qalmaqal, sadəcə, beynəlxalq ictimai rəyi manipulyasiya edərək siyasi manevr imkanı əldə etmək məqsədi daşıyır.
Bunu AZƏRTAC-a açıqlamasında politoloq, Bakı Dövlət Universitetinin Beynəlxalq münasibətlər və iqtisadiyyat fakültəsinin müəllimi Aytən Qurbanova söyləyib.
Onun sözlərinə görə, faktiki olaraq, həmin caninin cinayət əməlləri ilə bağlı yetəri qədər sübut var. Caniyə qarşı Azərbaycan Respublikasının Cinayət Məcəlləsinin müvafiq maddələri əsasında cinayət işi açılıb və qərar qəbul edilib. Hətta bu müharibə canisi beynəlxalq axtarışa da verilib. Ona görə də, Ermənistan tərəfinin təxəyyülünün məhsulu olan absurd iddiaların əksinə olaraq, heç bir halda beynəlxalq hüquq normalarının pozuntusu kimi təqdim edilə bilməz. Paralel olaraq, “Laçın” dövlət sərhədindən buraxılış məntəqəsindəki ümumi hərəkətliliyin tənzimlənməsi və prosesin idarə olunması qaydaları ilə birbaşa əlaqəsi olmayan bu həbsin yenidən Ermənistan tərəfindən “blokada” ssenarisinin gündəmə gətirilməsi vasitəsi olaraq istifadə edilməsi də qarşı tərəfin məkrli niyyətinin əsl mahiyyətini aydın şəkildə ifadə etmiş olur.
“Həmçinin onu da qeyd etmək lazımdır ki, Xaçaturyanın həbsi ilk olsa da, sonuncu həbs olmayacaq. Çünki artıq hər kəsə məlum olduğu kimi, Qarabağ ərazisində kifayət qədər çox qeyri-qanuni məskunlaşmış belə müharibə canisi var. Təbii ki, onlar birbaşa olaraq Ermənistanın hərbi-siyasi hakimiyyəti və onun havadarları tərəfindən himayə olunurlar. Halbuki üçtərəfli Bəyanatın müvafiq bəndlərinə əsasən onlar çoxdan Azərbaycan torpaqlarından çıxarılmalı idilər. Amma çox təəssüflər olsun ki, bəyanatdan irəli gələn müddəalar hələ də yerinə yetirilməyib”, - deyə A.Qurbanova bildirib.
Politoloq diqqətə çatdırıb ki, Azərbaycan Prezidenti İlham Əliyev həmin cinayətkarların təslim olduqları halda onlara qarşı amnistiya tətbiq oluna biləcəyini də bəyan etmişdi. Görünən odur ki, bu cinayətkarlar öz himayədarları vasitəsilə “humanitar məqsədlər” adı altında mərhələli şəkildə Azərbaycan ərazisindən çıxa biləcəklərinə ümid edirmişlər.
Aytən Qurbanovanın sözlərinə görə, Xaçaturyanın həbsi həm onlar, həm də himayədarları üçün kifayət qədər açıq mesajdır. Azərbaycanlılara qarşı soyqırımı törətmiş və günahsız insanları vəhşicəsinə qətlə yetirmiş canilər heç kimin köməyinə ümid etməsin. Gec-tez onların hər biri ələ keçirilərək ədalət məhkəməsi qarşısında cavab verməyə məcbur ediləcək.
Aytən Qurbanova vurğulayıb ki, Ermənistan tərəfinin yaydığı və yayacağı yalan bəyanatlar isə heç bir hüquqi əsası və təsir mexanizmi olmayan dəyərsiz kağız parçasıdır.
Bölmənin digər xəbərləri
