Xaçmazın əksər yaşayış məntəqələrinə elektrik enerjisinin verilişi bərpa olunub
Xaçmaz, 14 yanvar, Elxan Yusifli, AZƏRTAC
Güclü küləyin Xaçmaz rayonunun elektrik təsərrüfatında yaratdığı fəsadlar aradan qaldırılır.
Xaçmaz Rayon Fövqəladə Hallar Komissiyasının sədri Anar Oruclu AZƏRTAC-ın bölgə müxbirinə bildirib ki, rayonun əksər ərazilərində elektrik enerjisinin verilişi bərpa olunub. Hazırda işıqsız olan 40-a yaxın yaşayış məntəqəsində enerjinin bərpası istiqamətində iş aparılır: “Azərişıq” ASC-nin yerli qurumları fəsadların aradan qaldırılması üçün səfərbər edilib. Briqadalar səhərə kimi ərazilərdə olub, gücləndirilmiş iş rejimində çalışırlar. Əsas yaşayış məntəqələrindəki elektrik xətlərindəki qəzalar aradan qaldırılıb. Hazırda 40 yaxın yaşayış məntəqəsində tam, ya da qismən işıq yoxdur. Gün ərzində bütün kəndlərə enerjinin verilişi bərpa olunacaq”.
Qeyd edək ki, yanvarın 13-də əsən güclü külək səbəbindən Xaçmaz rayonunun elektrik təsərrüfatına ciddi ziyan dəyib. Rayon mərkəzində və 94 kənddə elektrik enerjisinin kəsilməsi səbəbindən 17 min 300 abonent işıqsız qalmışdı.
Bölmənin digər xəbərləri
