Xarici İşlər Nazirliyi gürcüstanlı yazıçının adını “arzuolunmaz şəxslər” siyahısından çıxarıb
Bakı, 13 aprel, AZƏRTAC
Azərbaycan Respublikasının işğal olunmuş ərazilərinə qanunsuz səfər edərək “Dövlət sərhədi haqqında” Qanunu pozmuş və buna görə də Xarici İşlər Nazirliyi tərəfindən tərtib olunmuş “arzuolunmaz şəxslər” siyahısına daxil edilmiş Gürcüstan vətəndaşı, yazıçı David Turaşvili adının bu siyahıdan çıxarılması xahişi ilə Xarici İşlər Nazirliyinə məktubla müraciət edib.
Nazirliyin mətbuat xidmətindən AZƏRTAC-a bildirilib ki, məktubda David Turaşvili bu səfərin təsadüfi və qərəzsiz olduğunu, heç bir halda Azərbaycan Respublikasının ərazi bütövlüyü, suverenliyi və qanunlarına hörmətsizlik xarakteri daşımadığını bildirib. O, müstəsna hal kimi “arzuolunmaz şəxslər” siyahısına salınması barədə qərarın ləğv olunmasını xahiş edib.
David Turaşvilinin müraciəti müvafiq qaydada nəzərdən keçirilib və onun adının “arzuolunmaz şəxslər” siyahısından çıxarılmasına dair qərar qəbul edilib.
Bölmənin digər xəbərləri
