MƏDƏNİYYƏT
XII Şəki “İpək Yolu” Beynəlxalq musiqi festivalı qədim Şəkinin tarixində yeni parlaq səhifədir
![](/files/galleryphoto/2023/2/1200x630/16885801263346756216_1200x630.jpg)
![](/files/galleryphoto/2023/2/1200x630/16885801263482340891_1200x630.jpg)
![](/files/galleryphoto/2023/2/1200x630/16885801262936641632_1200x630.jpg)
![](/files/galleryphoto/2023/2/1200x630/1688580126299078214_1200x630.jpg)
![](/files/galleryphoto/2023/2/1200x630/16885801261553518699_1200x630.jpg)
Bakı, 6 iyul, AZƏRTAC
Azərbaycanın ən qədim şəhərlərindən biri olan və Böyük İpək yolunun üzərində yerləşən Şəkidə XII Şəki “İpək Yolu” Beynəlxalq musiqi festivalının açılışı Azərbaycanın mədəni həyatında parlaq və mühüm hadisə oldu. Bu festival yarandığı ilk ildən əhəmiyyətli tədbirlər sırasında özünün layiqli yerini tutub və ölkəyə klassik və folklor musiqisinin həvəskarlarını cəlb edib. Festivalın 2010-cu ildən başlayan tarixi göstərir ki, Şəki hələ qədim zamanlardan bəri milli ənənələri qoruya bilir. Bu şəhərdə günümüzdə də Şərqin rəngarəng mədəniyyət ənənələri qorunub saxlanılır, yerli ustalar indi də təbii ipəyin istehsalı sirlərinə bələddirlər.
Azərbaycanın Mədəniyyət Nazirliyi, Bəstəkarlar İttifaqı və şəhər İcra Hakimiyyətinin birgə təşkil etdikləri gözəl musiqi bayramının ilk dəfə Şəki Xan sarayında keçirildiyi günlərdə çoxəsrlik çinar ağaclarının əhatəsində olan konsert meydançalarında, qədim Karvansara memarlıq kompleksində və Kiş dağ kəndindəki alban kilsəsində Azərbaycanın və dünyanın bir çox ölkələrinin ən yaxşı musiqiçiləri çıxış ediblər.
Həmin dövrdən illər ötüb və şübhəsiz ki, tanınmış kollektivlərin, görkəmli musiqiçilərin, dünyanın müxtəlif ölkələrindən musiqişünas alimlərin iştirak etdikləri XII Şəki “İpək Yolu” Beynəlxalq musiqi festivalı 2023-cü ildə də Azərbaycanın mədəni həyatında mühüm hadisəyə çevrildi və yenidən öz qonaqlarını qəbul etdi. Bu il Azərbaycan Bəstəkarlar İttifaqının dəvəti və TÜRKSOY təşkilatının dəstəyi ilə Çin Xalq Respublikasının Lyanşan-İy muxtar dairəsinin ansamblı, Qazaxıstan, Türkiyə, Özbəkistan və digər ölkələrdən olan folklor qrupları iştirak edirlər. Həmişə olduğu kimi, festivalın çoxsaylı iştirakçıları Şəkinin inkişafının, onun Azərbaycanın ən gözəl şəhərlərindən birinə çevrildiyinin əyani şahidi olur, yenidən buraya qayıtmağı arzulayırlar.
Festivalın açılışında qonaqları salamlayan Şəki Şəhər İcra Hakimiyyətinin başçısı Elxan Usubov şəhərin şöhrəti və tarixindən bəhs edib, onun 2016-cı ildə Türk dünyasının qeyri-maddi mədəni irs paytaxtı və 2017-ci ildə Türk dünyasının mədəniyyət paytaxtı elan edildiyini diqqətə çatdırıb. O, xüsusi olaraq qeyd edib: “Bu gün şəhərimiz UNESCO-nun Yaradıcı Şəhərlər Şəbəkəsinə daxildir, 2019-cu ildə isə ölkəmizin və şəhərin tarixində əlamətdar hadisə baş verib: Şəkinin tarixi mərkəzi Xan sarayı ilə birlikdə UNESCO-nun Dünya İrsi Siyahısına daxil edilib.
XII Şəki “İpək Yolu” Beynəlxalq musiqi festivalı əvvəllər olduğu kimi, xalqımızın, Şəkinin zəngin mədəniyyətinə layiq olan bayrama çevriləcək və turizm potensialının inkişafı baxımından böyük əhəmiyyətə malikdir”.
Elxan Usubov Azərbaycan Prezidenti İlham Əliyevin Şəkiyə səfəri zamanı şəhər haqqında söylədiyi sözləri sitat gətirib: “Şübhəsiz ki, Şəki zəngin tarixi və mədəniyyəti olan iri mədəniyyət mərkəzidir”. O əlavə edib ki, şəkililər dövlət başçısının bu fikirlərini xatırlayırlar və ölkənin rəhbərinin yüksək diqqətinə layiq olmağa çalışırlar.
Azərbaycanda festivallar şəhəri statusunu qazanan Şəkidə pandemiyadan sonra festivalın keçirilməsi onun təşkilatçılarının gözəl ənənəni davam etdirmək səylərindən xəbər verir. Bu, tamamilə anlaşılandır. Dünyaşöhrətli alim, Azərbaycan Bəstəkarlar İttifaqının sədri, AMEA-nın müxbir üzvü “Şərəf” və “Şöhrət” ordenləri laureatı, Xalq artisti, professor Firəngiz Əlizadənin təşəbbüsü ilə keçirilən Beynəlxalq musiqi festivalı turizmin inkişafı baxımından Şəkini daha da cazibədar edir. Bu gün festivala gələn bir çox ölkələrin turizm sənayesinin nümayəndələri Şəkiyə böyük maraq göstərirlər. Bu status musiqi festivalı ilə yanaşı, digər böyük tədbirlərlə də möhkəmlənib. Burada hər il şirniyyat və teatr festivalları təşkil edilir. Şəhərin qeyri-maddi irsinin qorunması sayəsində turizm potensialının inkişafına nail olunub və Şəki beynəlxalq aləmdə daha çox tanınır.
Festivalın açılışı günündə Azərbaycan Dövlət Akademik Opera və Balet Teatrının solistlərinin ifasında qonaqlara və şəhər sakinlərinə Firəngiz Əlizadənin “İntizar” vətənpərvərlik operası təqdim edilib. Tamaşa “Marxal” yay teatrında göstərilib.
Operanın librettosunun müəllifi M.V.Lomonosov adına MDU-nun Bakı filialının rektoru, akademik Nərgiz Paşayeva, dirijoru Azərbaycanın Əməkdar artisti Əyyub Quliyevdir. Bu, Firəngiz Əlizadənin yaradıcılığında ilk operadır. Onun premyerası bəstəkarın yubileyinə həsr olunmuş musiqi festivalı çərçivəsində olub. Operada Xarıbülbülün rənginin rəmzi, “Qarabağ şikəstəsi”, dağlarda soyuqdan donaraq həyatını itirən insanlar, xeyirlə şərin mübarizəsi diqqəti cəlb edir. Qələbəyə inamın rəmzi isə ağ atlı xilaskardır.
Tamaşadan sonra Şəhər İcra Hakimiyyətinin başçısı E.Usubov, festivalın bədii rəhbəri Firəngiz Əlizadə və Azərbaycanın TÜRKSOY-da təmsilçisi Elçin Qafarlı kollektivi təbrik edib, TÜRKSOY-un 30 illiyi münasibətilə onlara sertifikatlar təqdim olunub.
Festivalın Ulu Öndər Heydər Əliyevin 100 illik yubileyinə həsr ediləcək konserti iyulun 7-də olacaq. Konsertdə Azərbaycan Dövlət Sərhəd Xidmətinin hərbi orkestri çıxış edəcək.
AZƏRTAC üçün məxsusi olaraq
Larisa Cavanşir