Xocalı soyqırımı qurbanlarının xatirəsi Çində də anılmışdır
Bakı, 26 fevral (AZƏRTAC). Azərbaycanın Çindəki səfirliyi Xocalı soyqırımının 19-cu ildönümünə həsr olunmuş tədbir keçirmişdir.
Pekin Paytaxt Kitabxanasında təşkil olunmuş tədbirdə Çində akkreditə olunmuş diplomatik korpusun və beynəlxalq təşkilatların təmsilçiləri, Pekində təhsil alan azərbaycanlı tələbələr, iş adamları, ictimaiyyət nümayəndələri iştirak etmişlər.
Səfirliyin müşaviri Bayram Həsənov bildirmişdir ki, Azərbaycanın milli dövlətçilik tarixinin tədqiqində obyektiv mənbə kimi mühüm əhəmiyyət kəsb edən bir neçə xarici müəllifin kitabları səfirlik tərəfindən çin dilinə tərcümə edilərək nəşr edilmişdir.
Tanınmış avstriyalı yazıçı Erix Fayqlın “Kəskin dönüş: Erməni mifomaniyası və həqiqət: Sənədlər” kitabı haqqında məlumat verən B.Həsənov demişdir ki, nəşrdə Azərbaycan xalqının üzləşdiyi erməni terrorizmi haqqında geniş faktlar öz əksini tapmışdır.
Samuel Viimzin “Ermənistan: “xristian” terrorist dövlətinin sirləri” kitabının çin dilindəki nəşrindən danışan azərbaycanlı diplomat qeyd etmişdir ki, müəllif Ermənistanın maliyyə yardımını necə əldə etməsi və “soyqırımı” haqqında yalan hekayələr təşkil etməklə dünyanı aldatmasından bəhs edir. S.Viimz geniş tədqiqat nəticəsində belə qənaətə gəlmişdir ki, Ermənistanın digər ölkələrə hücumları və terror əməliyyatları rəsmi dövlət siyasətidir. Kitabda 20-ci əsrdə ermənilərə qarşı heç bir soyqırımın olmadığı sübut edilir və Ermənistanın xaricdən kütləvi yardım almaq məqsədilə qəsdən “soyqırım sənayesi” yaradılması haqqında yazılır.
Cohaniiz Raunun “Ermənistan və Azərbaycan arasında Dağlıq Qarabağ münaqişəsi. Qısa tarixi xülasə” kitabında isə məlumat verilir ki, 1980-ci illərin sonunda Ermənistanın Azərbaycana qarşı torpaq iddiası ilə başlayan münaqişə nəticəsində 30 mindən artıq insan həlak olmuş, Xocalı şəhəri məhv edilmiş, Azərbaycan ərazisinin 20 faizi işğal olunmuş, bir milyondan artıq insan doğma yurdlarından didərgin düşmüşdür. Tarixi faktlarla zəngin bu kitab geniş ictimaiyyəti Dağlıq Qarabağ münaqişəsi haqqında zəruri informasiya ilə təmin edir.
Xocalı soyqırımı ilə bağlı diplomat demişdir ki, XX əsrin sonunda baş vermiş bu faciə təkcə Azərbaycan xalqına deyil, bütün bəşəriyyətə qarşı yönəlmiş ən ağır cinayətlərdən biridir. B.Həsənov Xocalı soyqırımının dünya ictimaiyyətinə çatdırılması istiqamətində “Xocalıya ədalət” kampaniyası çərçivəsində görülən işləri yüksək qiymətləndirmişdir.
Tədbirdə “Xocalıya ədalət” adlı təqdimat olmuşdur.
Tədbir iştirakçıları avstriyalı yazıçı Erix Fayqlın “Kəskin dönüş: Erməni mifomaniyası və həqiqət: Sənədlər”, Samuel Viimzin “Ermənistan: “xristian” terrorist dövlətinin sirləri” və Cohaniiz Raunun “Ermənistan və Azərbaycan arasında Dağlıq Qarabağ münaqişəsi. Qısa tarixi xülasə” adlı çin dilində nəşr olunmuş kitabları ilə tanış olmuşlar.
Tədbir ərəfəsində Çində akkreditə olunmuş bütün diplomatik nümayəndəliklərə, ölkənin müvafiq dövlət qurumlarına, araşdırma institutlarına, yerli və xarici mətbuat orqanlarına səfirlik tərəfindən Xocalı soyqırımına həsr olunmuş press-reliz və Qafqaz Müsəlmanları İdarəsinin sədri şeyxülislam Allahşükür Paşazadənin Xocalı soyqırımının 19-cu ildönümü ilə əlaqədar dünya dini liderlərinə və beynəlxalq təşkilatlara müraciəti göndərilmişdir.
######
 |
 |
Bölmənin digər xəbərləri
