Xorvatiyada Ulu Öndər Heydər Əliyevin anım gününə həsr olunmuş tədbir keçirilib
Zaqreb, 12 dekabr, AZƏRTAC
Azərbaycanın Xorvatiyadakı səfirliyi tərəfindən Zaqreb Universitetində Ümummilli Lider Heydər Əliyevin xatirəsinə həsr olunmuş tədbir keçirilib.
Tədbirdə universitetin rəhbər şəxsləri, professor-müəllim və tələbə heyəti, ali təhsil müəssisəsində fəaliyyət göstərən gənclər təşkilatının nümayəndələri iştirak ediblər.
Azərbaycanın Xorvatiyadakı səfiri Anar İmanov çıxış edərək Ulu Öndər Heydər Əliyevin zəngin həyat və fəaliyyəti haqqında danışıb, onun dahi şəxsiyyət, uzaqgörən lider və dünyaşöhrətli siyasi xadim olduğunu, güclü və müstəqil Azərbaycan dövlətinin təməlini qoyduğunu, o cümlədən Vətənimiz qarşısında digər çoxsaylı xidmətlərindən bəhs edib. Səfir Ulu Öndərin müdrik siyasəti və dönməz əqidəsi sayəsində ölkəmizdə milli dövlətçilik ideyasının formalaşdığını, Ulu Öndərin 1993-cü ildə dövlətçiliyimizin təhlükə qarşısında olduğu bir vaxtda xalqın təkidli tələbi ilə hakimiyyətə gəldiyini, cəsarəti və yenilməzliyi sayəsində Azərbaycan dövlətini vətəndaş qarşıdurmasından, o cümlədən məhv olmaq təhlükəsindən xilas etdiyini vurğulayıb. Qeyd edib ki, onun yorulmaz fəaliyyəti və səyləri nəticəsində Azərbaycan böyük uğurlar əldə edərək bugünkü inkişafa nail olub. Diplomat, eyni zamanda, Ulu Öndərin hakimiyyətə gəlişindən sonra Azərbaycanın sabitlik və inkişaf dövrünə qədəm qoyduğunu, müstəqil Azərbaycanın Konstitusiyasının qəbul edildiyini və ölkəmiz üçün həyati əhəmiyyət kəsb edən ciddi siyasi və iqtisadi islahatlara başlanıldığını, müstəqilliyimizin onun sayəsində əbədi və dönməz xarakter aldığını tədbir iştirakçılarının diqqətinə çatdırıb.
Ulu Öndər Heydər Əliyevin siyasi kursunun bu gün Azərbaycan Prezidenti İlham Əliyev tərəfindən uğurla davam etdirildiyini vurğulayan səfir ölkəmizin müasir dövrdə əldə etdiyi çoxsaylı uğurlar və nailiyyətlər haqqında da geniş məlumat verib. O, Azərbaycanın müasir tarixində əsas hadisə olan 44 günlük Vətən müharibəsi zamanı Ali Baş Komandanın rəhbərliyi altında müzəffər Azərbaycan Ordusunun öz əzəli torpaqlarını erməni işğalından azad etdiyini, 2023-cü ilin sentyabrında isə 23 saat davam edən antiterror tədbirləri nəticəsində ərazi bütövlüyünü tamamilə bərpa edildiyini tədbir iştirakçılarının diqqətinə çatdırıb.
Diplomat çıxışında, həmçinin Azərbaycan-Xorvatiya münasibətlərinə toxunub, ölkələrimiz arasında dostluq və strateji tərəfdaşlıq əlaqələrinin uğurla inkişaf etdiyini bildirib. Səfir hər iki xalqın ötən əsrin 90-cı illərinin əvvəllərində oxşar tarixi hadisələrdən keçdiyini, təcavüz və işğalla üzləşdiyini, aparılan uzunmüddətli mücadilədən sonra ərazi bütövlüyünü və suverenliyini bərpa etdiklərini deyib. O, həmçinin Ermənistanın ölkəmizə qarşı həyata keçirdiyi işğalçılıq siyasəti və onun ağır nəticələri, o cümlədən törədilmiş etnik təmizləmə, soyqırımı və hərbi cinayətlər barədə də tədbir iştirakçılarını məlumatlandırıb. 30 illik erməni işğalı dövründə yüzlərlə yaşayış məntəqələrimizin tamamilə dağıdıldığını, maddi-mədəni irsimizin məhv edildiyini vurğulayan səfir həmin ərazilərdə genişmiqyaslı yenidənqurma işlərinin aparıldığını, onminlərlə həmyerlimizin yeni salınmış şəhər və kəndlərimizə köçürüldüyünü diqqətə çatdırıb.
İştirakçılarının suallarını cavablandıran səfir Azərbaycanın tarixi və bugünkü reallıqlarından da danışıb.
Tədbirdə, həmçinin Ulu Öndərin həyatı və fəaliyyəti haqqında fototəqdimat, həmçinin ölkəmizin tarixi və bugünkü reallıqları haqqında qısametrajlı film nümayiş etdirilib.
Sonda universitetin kitabxanasına, habelə fakültənin müəllim və tələbələrinə Azərbaycanla bağlı ingilis və xorvat dillərində nəşr olunmuş kitab və jurnallar hədiyyə edilib.
İqbal Hacıyev
AZƏRTAC-ın xüsusi müxbiri
Zaqreb
Bölmənin digər xəbərləri
