YAP-ın nümayəndə heyəti AK Parti Ərzurum şəhər təşkilatını ziyarət edib
Ərzurum, 15 aprel, Elmir Səftərov, AZƏRTAC
Türkiyədə səfərdə olan Yeni Azərbaycan Partiyasının (YAP) nümayəndə heyətinin üzvləri aprelin 15-də Ədalət və İnkişaf Partiyası (AK Parti) Ərzurum şəhər təşkilatını ziyarət ediblər.
AZƏRTAC xəbər verir ki, əvvəlcə AK Partinin Ərzurum şəhər təşkilatının sədri Av. İbrahim Küçükoğlu və YAP Azərbaycan nümayəndə heyətinin üzvləri arasında görüş olub.
Görüşdən sonra keçirilən mətbuat konfransında çıxış edən Av. İbrahim Küçükoğlu Türkiyədə keçiriləcək seçkilərdən danışıb, iki dövlət arasındakı qardaşlıq münasibətlərindən şad olduğunu bildirib, əlaqələrin bundan sonra da inkişaf edəcəyinə əminliyini ifadə edib.
Yeni Azərbaycan Partiyasının (YAP) idarə heyətinin üzvü, Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili deyib ki, YAP ilə AK Parti arasında əlaqələr gündən-günə inkişaf edir.
"Türkiyə son 20 il ərzində böyük inkişaf yolu keçib. Bu da bütün Türk dünyasını dirçəldib. Biz Müzəffər Ali Baş Komandan, Prezident İlham Əliyevin rəhbərliyi ilə 2020-ci ildə böyük tarixi Zəfər qazandıq. Bu qələbədə Türkiyə Prezidenti Rəcəb Tayyib Ərdoğanın da rəhbərliyi ilə Türkiyənin dəstəyini gördük. Azərbaycan xalqı da hər zaman Türkiyənin yanındadır. İnanırıq ki, qarşıdakı seçkilərdən sonra Türkiyə daha da güclənəcək", - deyə o vurğulayıb.
Milli Məclisin deputatı qeyd edib ki, Rusiya-Ukrayna müharibəsi nəticəsində Avropada enerji böhranı məhz Azərbaycanın və Türkiyənin apardığı uğurlu siyasətə görə dərinləşmədi.
SOCAR-ın Türkiyədə yatırımlarının 19 milyard dolları ötdüyünü deyən komitə sədri vurğulayıb ki, Azərbaycan Ərzurumdan idxalı 30 faiz artırıb. Həmçinin Bakı-Tbilisi-Qars dəmiryolu vasitəsilə sərnişin daşınması da planlaşdırılır.
YAP İdarə Heyətinin üzvü, deputat Elşad Mirbəşiroğlu çıxışında deyib ki, son 15-20 ildə Türkiyənin iqtisadiyyatı çox güclənib.
“Hazırda bütün dünyada Türkiyədəki seçkilər müzakirə olunur. Bu da Rəcəb Tayyib Ərdoğanın Türkiyəni gücləndirməsi nəticəsində baş verib. Əslində, R.T.Ərdoğan qazansa, dünya üçün də yaxşı olar. Tam müstəqil siyasət aparan Türkiyə nadir ölkələrdəndir ki, dünyanın müxtəlif bölgələrində ən təsirli aktorlardan birinə çevrilib”, - deyən E.Mirbəşiroğlu vurğulayıb ki, Azərbaycan və Türkiyə prezidentləri bütün beynəlxalq təşkilatlarda hər zaman iki dövlətin maraqlarını müdafiə ediblər. Həmçinin Rəcəb Tayyib Ərdoğan Balkan regionunda, Yaxın Şərqdə və ümumiyyətlə, dünyanın bütün yerlərində Türkiyənin nüfuzunu yüksəldib. Hətta qeyd edə bilərik ki, dünyada ən çox yardım edən 5 dövlətdən biri Türkiyədir.
Milli Məclisin deputatı Kamilə Əliyeva qeyd edib: “Ərzurumda gəzinti zamanı insanların Rəcəb Tayyib Ərdoğana, AK Partiyə olan sevgisini gördük. Dünyada baş verən müharibələr fonunda Türkiyə Prezidentinin yanaşması nəticəsində qardaş ölkə müsbət nəticələr əldə edib”. K.Əliyeva YAP və AK Parti arasında olan dostluq, qardaşlıq əlaqələrindən də bəhs edib, iki ölkə arasında imzalanan Şuşa Bəyannaməsini xatırladıb.
Deputat Anar Məmmədov isə diqqətə çatdırıb ki, Rəcəb Tayyib Ərdoğanın rəhbərliyi ilə Türkiyə son 20 ildə böyük uğurlar qazanıb. "Bizim qarşımızda böyük hədəflər var. Əsas prioritetlərdən biri Zəngəzur dəhlizinin açıqlaması ilə bağlıdır. Bu, bütün Türk dünyasının birləşməsi üçün vacib əhəmiyyətə malikdir”, - deyə o qeyd edib.
YAP Xətai rayon təşkilatının sədri Vüqar Rəhimzadə Türkiyənin texnoloji sahədə əldə etdiyi yeniliklərdən danışıb. O, qardaş ölkənin hərbi sahədəki uğurlarına Azərbaycanın da sevindiyini vurğulayıb. Bu sahədəki texnoloji yeniliklərin bundan sonra da dünyanı təəccübləndirəcəyini deyib. V.Rəhimzadə Türkiyə-Azərbaycan birliyi kimi münasibətlərin dünyanın heç bir ölkəsində olmadığını diqqətə çatdırıb.
Qeyd edək ki, Yeni Azərbaycan Partiyasının (YAP) idarə heyətinin üzvü, Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişilinin rəhbərlik etdiyi nümayəndə heyətinə YAP İdarə Heyətinin üzvü, deputat Elşad Mirbəşiroğlu, deputatlar Kamilə Əliyeva, Anar Məmmədov və YAP Xətai rayon təşkilatının sədri Vüqar Rəhimzadə daxildir.
Bölmənin digər xəbərləri
