Yaponiya Rusiyaya avtomobil ixracını məhdudlaşdırmaq niyyətindədir
Bakı, 18 iyul, AZƏRTAC
Yaponiyanın “Yomiuri” qəzeti yazır ki, növbəti sanksiyalar paketinin hazırlanması çərçivəsində Tokio Rusiyaya mühərrikinin həcmi 1,9 litrdən çox olan avtomobillərin göndərilməsinə qadağa qoyulmasını nəzərdən keçirir. Həmçinin Rusiyaya elektromobil və hibridlərin idxalının tamamilə dayandırılması təklif edilir.
AZƏRTAC xarici KİV-lərə istinadla xəbər verir ki, Yaponiya avqustda Rusiya Federasiyasına işlənmiş avtomobillərin göndərilməsinin həcmini azaltmağa hazırlaşır. Üstəlik, Yaponiyanın öz biznesi da zərər görəcək, çünki yalnız 2022-ci ildə belə maşınların Rusiyaya ixracı 1 milyard dollar həcmində qiymətləndirilib. Yapon nəşri qeyd edir ki, Rusiyaya işlənmiş avtomobillərin tədarükü bu növ məhsulun ixracının demək olar ki, dörddəbirini təşkil edir.
Yaponiya Rusiyaya qarşı sanksiyaları fəal, lakin ehtiyatla tətbiq edir. Məsələn, Yaponiyanın məhdudiyyətləri bütün iri Rusiya şirkətlərinə şamil edilir, Tokio yüksək texnologiyalar üçün müxtəlif növ maşın və avadanlıqların tədarükünü, həmçinin dəbdəbəli malların ixracını qadağan edir.
Eyni zamanda, Yaponiya Saxalin layihələrindən karbohidrogenlərin alınmasında özü üçün güzəşt qazanıb və bu tədarüklərin ölkənin enerji təhlükəsizliyi üçün vacibliyini vurğulayır. Yapon şirkətləri də “Saxalin-1” və “Saxalin-2” dəniz layihələrində iştiraklarını davam etdirir.
Bölmənin digər xəbərləri
