Yaponiyada qida əlavəsindən zəhərlənən iki nəfər ölüb
Pekin, 27 mart, AZƏRTAC
Yaponiyada “Kobayashi” əczaçılıq şirkətinin istehsal etdiyi, tərkibində qırmızı düyü mayası olan qida əlavəsinin qəbulundan zəhərlənən 2 nəfər ölüb, 106 nəfər xəstəxanaya yerləşdirilib.
AZƏRTAC Yaponiya mediasına istinadla xəbər verir ki, bu barədə ölkənin Səhiyyə Nazirliyi açıqlama yayıb. Bildirilir ki, “Beni-Koji” adlanan qida əlavələrini 3 il mütəmadi qəbul edən bir nəfər böyrək xəstəliyindən vəfat edib. İkinci ölüm hadisəsi barədə məlumat nazirliyə şirkətdə aparılan dinləmələr zamanı çatdırılıb.
Qida əlavəsinin qəbul edənlər arasında ölüm və zəhərlənmə halları ilə əlaqədar şirkətin istehsalı olan təxminən 6 min adda məhsul yoxlanılacaq. İkinci ölüm halı faktı məlum olandan sonra şirkət xolesterolu aşağı salan 5 adda 300 min qutu məhsulunu könüllü olaraq satışdan yığışdırıb. “Kobayashi” tərəfdaşı olduğu bütün şirkətlərdən tərkibində “Beni-Koji” olan bütün məhsulların satışını dayandırmağı xahiş edib.
Şirkətin istehsalı olan məhsulların Çində də satışı dayandırılıb. Çin mediası iddia edir ki, “Beni-Koji”nin fermentasiya prosesində böyrək xəstəliyinə səbəb ola biləcək zəhərli sitrinin meydana gələ bilər.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
